Mizoram News

Selam khaw mite leh Forest Deptt. inkar boruak a tang

Lengteng Wildlife Sanctuary chhunga thingzai chungchangah Selam khaw mite leh Forest Department te an inhmuhthiam loh avangin an inkar boruak a \ang hle a, vawiin hian Forest Department mite chu a ruka thingzai te senghawi tura kal leh an tum a, hetihlai hian Selam khaw mite chuan an thingzai te tumahin an laksak tawh dawnlo niin an sawi thung.

Aizawl-a Environment & Forests Department hnuaia Field Staff Association leh Champhai Forest Division hnuaia Field Staff Association chuan Selam rama thing zai ruk man tura thawk chhuak, Field Staff leh labour-te chunga kut thlaktu, Selam khaw mi nia hriatte man chhuak tur leh dan anga hrem turin thuneitute an ngen a, hetianga sawrkar hnathawk duty lai chunga kut thlak hi an dem thu sawiin, he thil thlenga mawhphurtu nia an hriat, Selam VC chu \hiat turin thuneitute an ngen a, tun hnu zelah Field Duty laia kut tuarte zangnadawmna pek an nih ngei theih nan Sawrkarin budget-ah sum dah ve \hin rawh se am ti a, Lengteng Wildlife Sanctuary leh a vela, dan lova thingzai awm, man tawh leh man loh zawng zawngte hi dap chhuaha senghawi vek ni rawh se tiin, heng thingzaite senghawi tur hian vawiin hian kal an tum a ni.

Kar kalta Zirtawpnia Selam khaw miten Environment & Forests Depatment mite an sawisak bakah an truck an halsak bawk avangin, he thil thleng chungchang hi sawrkarin a ngaihtuah mek a, Home Minister Pu R.Lalzirliana chuan he thil thlenga mawhphurtute chu an phu tawk ang hremna pek an nih tur thu a sawi a ni.

He thilthleng chungchang hi nimin khan IGP Pu Zorammawia hovin Police Officer ho in an sawi khawm a, dan bawhchhetute man chhuak tura hma an lak dan tur an rel a, Selam-ah hian IR sipaite pawh Khawzawl a\angin tirh luh ni se an ti a ni.

He thil thleng chungchangah hian zawhna chhangin Selam YMA President Pu MC Ngaihliana chuan, thingzai chungchangah dan bawhchhia an nih an inhriat loh thu leh an ramchhung a nih avangin an thuneihna a nih thu a sawi a ni. Pu Ngaihliana chuan an khaw dinhmun sawifiahin, Selam khua hi Lengteng Wildlife Sanctuary-ah rinluh tum a ni a, Forest department chuan an khua chhuahsan tir chhawmdawlna pawh pe turin a tiam a, kum 1999-ah Wildlife Sanctuary a puang turin Preliminary Notification tihchhuah a ni a, hetah hian sq km 120 a huam a, Selam khaw ram chanve pawh rinluh tel a ni a, amaherawhchu hei hi an remti lo a, a hnuah a puma rinluh a nih theihna turin sawrkar chuan a dawr zui a, inremna awm lovin kum 2005-ah Wildlife Sanctuary-a puanna tur final notification tihchhuah a ni a, hemi \uma an sawisel chuan in ram huam chin a te em mai tiin chhanna an hmu tih a sawi a ni.

Khatih hun laia MNF sawrkar hnuaia Forest thuneitute pawh an biak hnuah an chungchangah hmalakna a awm lova, kum 2010 ah Forest RO pakhatin a tlawh a, chutah chuan final notification tihchhuah a nih tawh avangin tihdanglam theih a ni si lo a, sawrkar tan an ram an pek law law chuan an ram chhuahsana hmun danga an inbenbelna tur cheng nuai 10 an pe ang a, a nih loh pawhin hmun dangah khua an dinsak anga cheng nuai 10 hu in an sak sak ang tih a ni a. Hei hi an remtih hnuah October 2010 ah sawrkarah an thlen a, kum 2 chhunga puitlin nise an ti a, amaherawhchu sawrkar a\angin chhanna an hmu mai lova, kum 6 liam hnuah pawh chhanna an hmu ta chuang lova ni.

Nikum khan an bialtu MLA Pu TT Zothansanga chuan Selam khuaa di in tam tak chu rangva in thlak turin Di In nuaibo programme a \an sak leh tih YMA hruaitute chuan an sawi a, hemi \um hian chhungkaw hrang hrang te chu rangva bundle 4 \heuh pek an ni a, hemi bawhzui hian tunah hian in sakna turin thing an la ta niin an sawi a ni.

Pu Ngaihliana chuan zirtawpni-a thilthleng chungchangah an khaw mipuite an inthunun zawh lohnaah an thiam lo tih sawiin, amaherawhchu an ram chhunga thing an lak ve chu an dikna a ni a ti a, an thing lak sa te chu tumahin an laksak tawh dawn lo nia sawiin, an khua pawh hemi chungchangah hian an inlungrual a, engpawh thleng theiah an dikna leh chanvo humhalh turin an inring hle tih a sawi a ni.
Selamah hian chenna in 227 a awm a, mi 1100 vel an cheng ni a sawi a ni.

Thu dawn danin chuan, Selam panna kawng siam thar chuan Lengteng Wildlife Sanctuary, Selam a\anga km 3 velah a kal tlang a, he kawng thar a\ang hian Samakzawla ngaw \ha tak, Chhura rual thing lian \ha tak tak dinna chu awlsam takin a kal pawh theih a, helai hmunah hian tun hnaiah thing tam tak zai rûk a ni tih hriain, a man tur leh zai rûk a nih tawh lohna tura thil tih dan tur ngaihtuahin Zirtawpni khan Aizawl Forest Protection Division a\angin Range Officer, Pu K.Zairema hovin, mi 15 vel chu Department truck pakhat leh bus pakhatin an kal a, Khawzawl Wildlife Division a\angin mi 9 vel leh Champhai Forest Division a\angin mi 6 leh labourer 5 an kal bawk a ni.

Heng mite hian Champhai Forest Division truck pakhat an keng bawk a, Selam khaw thlen hma lawk-ah kawng sira thingzai dah khawm tam tham tak an hmuh chu Wildlife Sanctuary a\anga zai a ni tih hriain, man turin truck-ah an hlang a, hetihlai hian an hotu leh field staff dangte chuan an khawtlang hruaitute be turin Selam khua an pan a, Selam VCP hmuin, thingzai chungchang hi an sawipui a, hetihlai hian, khaw chhung mite chu thawk chhuakin, Environment & Forest Department Field Staff leh labour-te thing load-na hmun chu motor-in an pan ta a, Truck-a thingzai hlangtute chu hlang thla leh vek tura an hrilh bakah, Field Staff uniform ha mi pahnih, driver leh Forester te chu kut an thlak nghal a, Forester hi a na zawk nia sawi a ni. Field Staff leh labour-te hi an theih ang angin Tualcheng khuaah an tlanchhia a, Selam khaw mite chuan Champhai Division truck hi an hâl chhe nghal bawk a ni.

Environment & Forests Department hotute chuan nikum March thla pawh khan Lengteng Reserve Sanctuary huam chhunga Samakzawl ramah hian thingzai ruk \hahnem tak an man tawh niin an sawi a, ti tawh lo turin Selam mite leh khawtlang hruaitute chu an ngen niin an sawi bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram