Rajya Sabha MP Candidate te tana hming pekluh theih ni hnuhnung ber nimin khan Congress Party candidate Pu Ronald Sapa Tlau leh UDF Thlawp MNF party aiawhin Pu L Ramkinlova ten nomination an file.
Tun thla ni 19 a thlan tur Rajya Sabha MP Candidate tur te hian Aizawl Assembly Secretariat ah nomination hi Returning Officer, Assembly Secretary Pu Ngurthanzuala leh Assistant RO Assembly Additional Secretary Pu S.R. Zokhuma te hmaah an file a ni.
Ruling Party Candidate, Kum 60 mi Pu Ronald Sapa Tlau hi Pu Chhuanvawra Tlau (L) fapa ani a, February ni 2, 1954 khan Hualtu khua ah piangin, nupui Ramthanpari Tlau nen fapa 2 an nei a, Aizawl Zonuam vengah an cheng a. Tunah hian ZENICS Chairman hna a chelh mek a, kum 2008 khan Hrangturzo bial aṭangin Congress ticket-in assembly inthlan a chuh a, a tling zo lo a ni. Pu Ronald Sapa hian MA (Religious History) leh MA(Mass Comunication ) Howard University, USA ah a zir zova. Congress Party ah General Secretary leh Communication department Chairman nihna a chelh mek a, hemi hma hian Chief Spokes Person bakah nihna dang pawimawh tak tak a chelh tawhin, lehkhabu 3 a ziak tawh a ni.
UDF Thlawp MNF Party atanga Candidate Pu L Ramkinlova hi kum 1962 march ni 16 ah Ratu khua ah a piang a, a pa hi Pu CS Dailova(L) niin a nupui Pi KT Kimi nen fanu 2 leh fapa 2 neiin Aizawl Falkland ah an cheng mek a ni. Pu L Ramkinlova hian thiamna lamah MA(Eng) a zir zova, Advance English-ah Certificate Course a zo tawh bawk. MNF party ah hian General Secretary nihna a chelh mek a, kum 1987 ah MNF party ṭhalai President hmasa ber niin MNF party ah nihna pawimawh dang chi hrang hrang a chelh tawh bawk a ni.
Rajya Sabha member hi MLA te thlan tur a ni a. MLA 40 awmna Mizoram Assembly-ah hian rorellai Congress in MLA 34 an nei a; eptu MNF-in MLA 5 neiin an thawhpui MPC in MLA 1 an nei a ni. Rajya Sabha inthlan buatsaih a ṭulna chhan hi tuna Rajya Sabha MP ni mek term hnih chhung a zawna Rajya Sabha member nihna chelhtu Pu Lal-hmingliana hun chu July ni 18 khian a tawp dawn vang a ni.
Rajya Sabha inthlanna lo awm tur atana hming pekluhte hi vawiinah endik a ni ang a, Ningani khi hming pelutte tana inhnuhdawhna hun hnuhnung ber atana ruat a ni a. Vote thlak ni June ni 19 khian zing dar 9 aṭanga tlai dar 4 thleng vote thlak theih a ni ang a; hemi ni vek tlailam dar 5 aṭangin vote chhiar ṭanin result hi puan nghal a ni ang. Inthlan kaihhnawih hi June ni 21 a zawhfel vek turin Election Commission chuan a ruahman a ni