Nimin khan Mizoram Pradesh Youth Congress Committee chuan thuchhuah siamin, Politician inti ṭhenkhatten tunhnaia an thusawinaah, “Central sawrkarin buhfai man tisang lovin Mizoram sawrkarin buhfai man hi a tisang,” nia an sawi chu thudik tawklo a ni, tiin, Mizoram sawrkar hian buhfai man hi a tisang ngai lo a ni, an ti.Nimina MPYCC thuchhuah chuan Buhfai rate Rs.9.50 hi kum 2002 aṭanga hman ṭan a ni a, Buhfai hi economic cost-a Food Corporation of India aṭanga Mizoram sawrkarin a leina chu ni 03.05.2006 khan Quintal-ah Rs.1350/- a ni a. Ni 28.06.2006 ah khan Food Corporation of India chuan a rate rawn tisângin Quintal-ah Rs.1597/- a ni a, ni 22.05.2008 khan Quintal-ah Rs.1716 ah sâng lehin; ni 01.12.2010-ah pawh FCI hian Buhfai rate hi Rs.2751/- ah a tisang leh a. Tun dinhmunah Buhfai man chu Food Corporation of India aṭang hian Quintal 1-ah Rs.2981/- a ni mek a ni an ti a, hetiang hi thil awmdan a nih laia thudik tawk lo mipui hriata sawichhuah fo a ni chu MPYCC chuan pawi a ti takzet a, tun hnuah chuan thu belhchian dawl chauh sawi tawh thin turin MPYCC chuan a ngen a ni, an ti.
MPYCC chuan buhfai hi Rs.9.50 a nih laia sawrkarin Kg 1-ah mipui tana subsidised-na chu Rs.4.45 a ni a, tuna economic cost-a Kg 1-a Rs.15/- kan tichung pawh hian sawrkarin a mipui tana subsidy a pek chu Kg 1 ah Rs.10.75 a la ni a. Chuvangin, Central sawrkar (FCI) in buhfai hi vawi tam tak rate a tisang ṭhin a, Mizoram Sawrkar hian a tisang ve ngailo zawk a ni tih hi MPYCC chuan Mizoram mipuiten lo hria se a duh a ni, an ti a.
Sawrkarin buhfai man a tihsan chungchang Party ṭhenkhatten mirethei leh harsa zawkte rawkna ang hialah an sawi chu thudik loah MPYCC chuan a ngai tih sawiin, mirethei zawk BPL leh AAY te chanvo hi pakhat mah a rate tihsân a ni lo a. A rate ngaiin an la mek a, sawrkar hmalaknain a rate ngaiin an la zel dawn bawk a ni, an ti a, tuna buhfai man tlema sang deuha Supply Department-in a tihte hi chu APL (Above Poverty Line) mi rethei leh harsa te chunga mi an ni a, thudik hrula thubelhchian dawllo hmanga mipuite tih chiai tumna hi bansan ni tawh se MPYCC chuan a duh takzet a ni, an ti bawk.