Zothlifim Logo
Loading ...

Lunglei South ṭhalai Kawng ṭha Duh Pawl inti te chuan an huamchhunga kawngpui te chu tun inrinni lo awm tur ral hma ngeia siamṭhat an phut tih an sawi a, hemi hun chhunga siamṭhat a nih loh chuan a ṭul anga hmalak an tum tih an sawi. Nimin khan Aizawl Press Club ah thuthar thehdarhtute kawmin Lunglei chhim lam kawng, NH-54A, AOC Ram-thar aṭanga Hrangchalkawn leh NH-54 Hrangchalkawn aṭanga Zobawk chu kum 20 chuang teh meuh a ṭhat tawh loh avangin Sub-Headquarters YMA Lunglei leh Branch YMA hrang hrang Salem, Lunglawn, Luangmual, Sethlun, Theiriat, Hrangchalkawn, Lungpuizawl leh Zobawk te’n kum tam tak liam ta aṭang khan hma an lo la tawh ṭhin tih an sawi a. Mahse awmzia a awmloh avangin heng khuaa ṭhalai kal khawmte chuan NGO pawl hrang hrangte hma lo lak tawhna chu chhunzawm turin Lunglei South ṭhalai Kawng ṭha Duh Pawl an din tih an sawi a. “Helai kawng hi furah a diak nasa em em thin a, nipui leh ṭhalah a khu em em bawk a. He kawngin a paltlang veng hrang hranga mipuite hriselna nasa takin a tichhia a, lirthei an neih ve chhun ten a tuar em em bawk tih an sawi a. He kawng hi a chhiat em avangin lirthei chetsualna pawh vawi eng emaw zat a lo thleng tawh a ni an ti.

Kawng ṭha duh pawl chuan an harsatna te hi PWD changtu Minister Pu Lal Thanzara hnenah niminpiah khan an thlen a, kawngpui hi a rang thei ang bera siamṭhat a nih theih nana hma a lak pui tur thu a lo hrilh niin an sawi a ni.