Ministry hrang hrangin Mizoram hna thawk chaklo min ti thin:CM

Chief Minister Pu Lal Thanhawla chuan nimin khan Chief Secretary conference room-ah Mizoram sawrkar hnuaia Secretary te meeting a neihpui.
Chief Minister chuan an sawrkar hmasak khan hetiang meeting hi a neihpui tawh thu leh DC leh SP zawng zawngte pawh alo neihpui tawh thu sawiin, ngaihtuahna ṭha nia a hriatte sawrkar hnathawk hotute (bureaucrats) sawipui a duh vang ṭhin a ni a ti.

Chief Minister chuan Central sawrkar laipui dawr tura kal châng hian Ministry hrang hrangin Mizoram chu hnathawk chaklo min ti ṭhin a, a zahthlak duh hle a ni a ti a. Hei vang hian July 2014 khan department tinte chu an hnathawh te, plan fund an hman dan te, utilization certificates leh performance reports thehluh thuah a sawipui tawh a ni a ti a. Chief Minister chuan Secretary te chungah sawrkarin beiseina sang tak a nei a ni a ti.

Chief Minister chuan kumin 2015 a kan thawh tur zinga pawimawh hmasa chu project leh scheme hrang hrang thawh mekte vil ngun leh endik hna a ni a ti a, Flahship programme NLUP kalpui danah NITI Aayog-in thil hriat duh an rawn dilte chu kimchang taka hrilh hre thuai turin a chah a, thil dang Secretary tena an hriat tura a tarlan zingah Pu Hawla chuan Central sawrkar hnuaia senior officer ten VIP te thurawn ngaihpawimawh hmasakah an neih thin chu Mizoramah pawh ching ve ila a ti a. VIP te thurawn bawhzui thuai a nih theih nan an puala a bawhzuina leh endikna file bik te siam tha a tih thu a sawi a. A bikin Assembly sessionah thudik tawklo pek chang awm thinte hi zahthlak a tih thu sawiin, sessiona hetiang sawichhuah tur an pekte vil uluk thin turin a chah bawk a ni.

Chief Minister chuan Audit chhanna te ngaipawimawh tura chah bawkin, central sawrkar program ṭhenkhat direct fund hmu thin NRHM, National Horticulture Mission, National Bamboo Mission leh a dangte hi a vil hna-in duhthu a sâm lo tiin, kumin sawrkar kum thar aṭang chuan heng fund lo kal te hi Finance Department kaltlanga tih tawh tur a ni a ti.

Meeting hi Chief Secretary Pu Lalmalsawma, IAS in a kaihruaiin, meeting-ah hian agenda siam anih loh thu leh Chief Minister in sorkar hnathawk hotulu te kum thar chibai buk paha sorkar leh mipui tana thil tha tura ngaihdan kan neihte sawiho a duh vanga in kokhawm an nih thu a sawi a ni. Secretary te an kal tha hle a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram