Skip to content
Home » Chanchinthar » Mizoram pumah vote nei thei mi 713574 an awm

Mizoram pumah vote nei thei mi 713574 an awm

Nimin khan Election Commission of India rem tihna in Electoral Roll Special Summary Revision ni 01.01.2015 a kumtling chinte tana buatsaih chu Mizoram pumah tar chhuah a ni a, Mizoram pumah vote nei thei mi 713574 an awm a ni.tableRevision hma (Draft Roll)a voter awm zawng zawng chu mipa 342729 leh hmeichhia 355537 niin, an vaiin voter 698266 an awm a, Revision hnu Final publication-a voter zawng zawng chu mipa 349792 leh hmeichhia 363782 niin an vaiin voter 713574 an awm a ni.

Mizoram puma Voter punna zat hi 15308 (mipa 7063 leh hmeichhia 8245) niin za-a 2.19%-in a pung a, Voter tamna ber Assembly Constituency chu 36-Tuichawng niin voter 27314 an awm a, Voter tlemna ber Assembly Constituency chu 34-Thorang    niin, voter 12723 an awm a, za zela voter pun tamna ber Assembly Constituency chu 33-Lunglei South niin, voter 522 awm belhin 3.4%-in an pung a, za zela a pun tlemna ber Assembly Constituency chu 21-Lengteng niin, voter 109-a pungin an punna hi 0.67% chauh a ni.

Za zela a pun tamna ber District chu Saiha District niin voter 977-in an pung a, an punna hi 2.85% a ni a, za zela a pun tlemna ber District    chu Champhai District niin, voter 1217-a pungin an punna hi 1.55% a ni a, Hmeichhia voter tam zawkna Assembly Constituency 29 awmin, Mipa voter tam zawkna Assembly Constituency 11 a awm a, Mizoram puma Gender Ratio (Mipa leh hmeichhia inthlauhna) chu 1040 (mipa 1000 zelah hmeichhia 1040 an awm) a ni.

Serchhip-ah pawh nimin chawhma dar 11 khan Serchhip DC Meeting Room-ah Serchhip District chhunga Assembly Constituency 3 (Serchhip, Tuikum leh Hrangturzo) a hman tur Electoral Roll siam thar chu tlangzarh a ni a, he hunah hian Recognised Political Party aiawh te, Chanchinbu mi te, Tlawmngai Pawl sawm bik leh Official pawimawhte an kal khawm a ni.

Heng Assembly Constituency pathuma Voters zawng zawngte hi EPIC (Electoral Photo Identity Card) siam sak vek an ni a, Electoral Roll a thun thar te erawh chu tun thla tawp a National Voters’ Day hman anih hunah an EPIC hi hlan an ni ang.

Electoral Roll thar hi recognized National/State Political Party te leh Serchhip Sub-Headquarters YMA hnenah a thlawnin sem a ni a; mi mala nei duh chuan Soft copy pakhat `100, leh hard copy phek khat `5 zelin lei theih tura ruahman a ni. Heng hi District Election Office-ah ngaihven theih a ni ang.

Electoral Roll thar en duh chuan mahni bialtu ERO/AERO/BLO emaw, DC/DEO Office-ah en theih a ni.