Mizoram State Election Commission chuan kumina Village Council inthlanpui neih turah VC seat awm thei zat a siam danglam a, seat awm tur zat tar-lanna, tuna hman mek, The Lushai Hills District (Village Councils) Act, 1953 siamthatna, The Lushai Hills District (Village Councils) (Amendment) Act, 2014 a hmang tawh dawn a ni. He dan ang hian, chhung-kaw 200 aia tam lo chin in Village Council member 3 an nei ang a, member 1 chu hmeichhia a ni ang. Chhungkaw 201 leh 500 inkar khua te chuan Village Council member 5 an nei thei ang a, member 1 chu hmeichhia a ni ang. Chhungkaw 501 leh 1000 inkar khua te chuan member7 an nei thei ang a, member 2 chu hmeichhia an ni ang a, Chhungkaw 1000 chuang awmna khua te chuan member 9 an nei thei ang a, member 3 te chu hmeichhia an ni ang.
Heng hmeichhia member te hi thlan tur an nih avangin nomination pawh an file vek tur a ni a. Hmeichhia leh mipa Candidate te hi Ballot Paper rawng hran siam sak an ni ang a. Election Symbol pawh Party Affiliation nei te chuan Reserve Symbol tho an hmang ang. Ballot Box hran erawh siam an ni lovang. Hetihlai hian hmeichhia ten nomination an file lo a nih chuan seat chu a ruak a dah mai tur a ni a, seat ruak hnawhkhat turin State Election Commission-in tul a tih hunah Inthlanna a buatsaih sak dawn a ni