Mizo Students’ Union (MSU) ngenna angin Mizoram University (MZU) chuan Special Exam a buatsaih dawn a, Under Graduate Courses,2015 Exam paper endiknaah pawh ‘Coding System a hmang dawn ta a ni.
Nimina MSU thuchhuahin a tarlan dan chuan MSU ngenna MZU thuneitu sang Academic Council (AC) in a lo pawm tawh angin Semester System a zirna kalpui anih hma,Annual System anga Degree Courses hman a nihlaia batch hnuhnung ber 2006-2010 a zir, chhan hrang hrang vanga Bachelor Degree pass chhuak zo ve lo te tana ‘Special Exam ‘ buatsaih tura MSU in a ngenna chu tihhlawhtlin a ni dawn tih an sawi a, heng zirlai chhan hrang hrang avanga pass zo ve ta lo te tana Exam hun hi kumin September thla velah MZU Examination Department chuan neih a tum a,chutihrualin exam tur zirlaite an tam emaw tlem dan a zira exam hun hi hmaa tlai thei a ni a. Kum 2006-2010 batch, zirlai exam tura inbuatsaih MSU office a inreport leh inreport chiahlo te khan he thil chungchang hi ngaihven thuai turin MSU chuan a ngen a ni.
MSU Gen. Hqrs,Aizawl hruaitute hian nimin khan MZU-a Controller of Examination Prof.RL Thanmawia leh officer dangte hmuin Mizoram University hnuaia Under Graduate Courses examination,2015 a zirlaite exam paper endik na-ah ‘Coding System’ MZU Examination Department in hmanloh a tum avanga Mizoram College Teacher Association (MCTA) in zirlaite exam paper endik chawlhsan an tum chungchanga zirlaite chunga harsatna awm thei hrang hrangte chinfel dan kawng zawn a nih theihna tur chungchang an sawipui a, zirlaite exam paper endik kawngah zirtirtu te’n an mahni zirlaite exam paper an endik chuan induhsak bikna leh thil diklo tak a awmtheih dawn avangin exam paper chu eng college zirlaite exam paper nge a nih,tih hriat miah lohna tur ‘coding system’ hmang tura MSU leh MCTA te ngenna angin MZU Exam Deparment hotute chuan ‘Coding System’ chu hman thar a nih dawn thu MSU hruaitute hi an lo hrilh a, coding system hmang turin inbuatsaihna an neih ṭan thu MSU hruaitute hi an lo hrilh a, hetihlai hian he thil hian hun a duhrei avang leh under graduate courses academic calender a fuh chiah loh avanga state danga lehkha zir tum te tan exam result tih chhuah a tih khawtlai thin avanin zirlai thahnem takin state danga admission an zawnna kawngah harsatna an tawh thin avang a ti lo mai a nih thu an sawi bawk.