AMC sum tur pe chhuak thuai turin duh

MPC ṭhalai Gen. Hqrs. chuan nimin khan thuchhuah siamin Aizawl Municipal Council (AMC) Development fund atana cheng nuai 2000 chuang zet sawrkar laipuiin a rawn pek thlen tawh vawiin thlenga Mizoram State Treasury-a sawrkarin ala hreng bet reng chu âwm lo an tih thu sawiin, a rang thei ang bera AMC kutah hlan turin Mizoram sawrkar an phut tih an sawi.
MPC ṭhalai chuan Pu CT Zakhuma AMC Chairman kaihhruaina hnuaiah Aizawl khawpui chhung hmasawnna hnathawh (Development) chak taka kalpui mek a ni a, hmabak tam tak chhunzawm tur a nei a. A bikin mipuite him zawkna tura hnathawh tur ṭul tak tak a awm laia Mizoram sawrkarin mipuite hmakhua ngaihtuahna nei hauh lova AMC sum a hrensak reng chu mipuite thamlohna leh palzutna lian taka an ngaih thu an sawi a, Mizoram sawrkarin AMC sum a kawlsak, a hun taka a pekchhuah loh hian a interest a chawi reng a. Heti khawpa Mizoram sawrkarin sum indaih lohna a neih avanga harsatna lian tak a tawh reng laia, a phur tibelhchhah tur, a insiamchawp zel mai chu Financial management-ah Mizoram sawrkar a fail chian zia leh kal ngaihna an hriat tawh loh zia a tilang chiang hlea an ngaih thu an sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram