Bru laklêt hna kalpui theih ni lo

Tripura Bru Camp-a cheng Mizoram a laklet tur te enfiah kar 2 chhunga thawh tawhah enfiah tura kal an awm loh avangin, tun thlengin Bru laklet hna chu kalpui theih a ni ta lo a, nimin aṭanga Khakchang-para relief camp-a awm Bru hote Mizorama hruai kir hna thawh ṭan tur pawh ṭhulh a ni.
Home department-a Additional Secretary Pu Lalbiak-zama chuan Khakchangpara relief camp-a awmte hi Mizoram mi an nih enfiahnaa inlan an awm loh avangin ruahman anga nimin aṭanga tun kar chhunga laklet tura tih chu laklet theih an nih loh thu a sawi a. Hamsapara relief camp aṭanga laklet leh tura Mizoram mi dik tak an nih leh nih loh enfiah hna erawh chu tun thla ni 29 leh July ni 2 inkar chhung khian buatsaih leh a ni ang a ti a. Bru laklet lehna atana sawrkarin ruahmanna a lo siam tawh chu kal tlangpui chhoh zel a ni dawn a ni a ti.

Bru chhungkaw 3,455 lak let hna thawk tur hian ruahmanna siam sa angin June ni 2 aṭang khan thawh ṭan a ni a. Kaskau relief camp-a awmte chu July ni 2 aṭang khan endik hna thawh ṭan a ni a; mahse tumah an inlan loh avangin he relief camp aṭang hian laklet an awm lova; a dawt leh ami Khakchangpara relief camp ami pawh tumah an inlan loh avangin lak let an ni lo a. Tun thlengin Bru pakhat mah lak let an la awm rih lo a ni.

Mamit district bawrhsap Pu Vanlalngaihsaka chuan Mizoram aṭanga Bru relief camp-a kal official-te hian Bru laklet hna an thawh dan zawng zawng hi video-in an la vek tih kan Corr a hrilh a. A lokir duhte chawlh lailawkna tur transit camp te, endiktu tur doctor leh an khua ṭheuhva an kirna tur ruahmanna pawh fel taka tih vek a nih thu a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram