CCN-in NLUP hnuaia Serthlum chin eizawnna dinhmun an zirchianna tlangzarh

Mizoram University mithiamte telna Consultative Committee for NLUP (CCN)-in NLUP hnuaia serthlum chin eizawnna dinhmun an zirchian-na, “Study on the success and impact of NLUP under Horticulture Sector in Mizoram : Mandarin Orange” report chu nimin khan Chief Minister Pu Lal Thanhawla’n NIB conference hall-ah a tlangzarh.
NLUP hnuaia leilung behchhan eizawnnaah serthlum chin thlang an tam ber a, CCN hian District 8 tuam chhuakin khaw 35-ah zirchianna neiin Horticulture hnuaia serthlum chingtu 8538 zinga 6565 te dinhmun an enfiah a ni.

An zirchiannaa tarlan a nih danin, NLUP hnuaia serthlum chinna hmun hian ram hectare 3100 a khuh a, kum 2017 aṭanga thar ṭan tura chhûtin kung khatah pum 48 chauh pawh rah se, Mizoram serthlum thar chhuah chu Metric Ton 1095-in a pung chho tura chhut a ni a, kum 2020 ah chuan Metric Ton 7838 a pung turin chhut a ni bawk. Hetih rual hian serthlum chin thlangtu zaa 25 te chuan an thlai zaa 50 aia tam hloh tawhin an eizawnna thlan chu an hlawhchham pui tawh a ni.
He report-ah hian serthlum chingtuten an eizawnna an hlawhtlin pui theihna tura rawtna pawimawh tak tak tarlan tel a ni a. Chumi zingah chuan beneficiary te tlangram lo neiha an kir leh lohna turin an thlai puitlin chhung eizawnna tur ngaihtuah sak te, serthlum chawmna tur tui lakna ngaihtuah sak te, thlai thar hralhna tur kawng lo sial sak te, beneficiary ten sum pukna tur an hmuhna tur kawng ngaihtuah sak leh thil dang eng emaw zat a tel a ni.

CCN in loneitute dinhmun tlangpui a tarlanah chuan, NLUP kalpui hnuah tlangram lo neihna hmun leh tlangram lo neia eizawngtu chhungkaw zât chu nasa takin a tlahniam ve ve a. Mizorama chhungkaw za zela 66.44 tlangram lo neia eizawng chu zaa 46.14 ah a tlahniam a, chhungkaw khatin lo an vahna hmun chu zaa 22.52 zelin a tlahniam bawk a ni.

Hemi rual hian leilet a eizawng chhungkaw awm zat chu zaa 16.19 aṭangin zaa 27.20 ah a pung chho thung a. Tlangram lo neia thawktu labour zat chu zaa 47.69 aṭangin zaa 29.54 ah a tlahniam a. Leilet neitu labour zat chu zaa 18.17 aṭangin zaa 31.14 ah a pung ve thung a. NLUP ṭanpuina dawngtu te zingah bank account nei zaa 46.81 atangin zaa 98.24 ah a pung a, Serthlum phun zawng zawng zaa 68.35 chu an nung tha in puitling thei tura ngaih a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram