June ni 11-ah Green Mizoram Day

* Thing ṭiak nuai 36 chuang phun a ni tawh
* Kumin thupui ‘I dam khawchhuah nan thing phun rawh’
State Level Committee on Green Mizoram chu nimin khan Chairman Pu Lal Thanhawla, Chief Minister kaihhruaiin an ṭhukhawm a, tun thla ni 11-ah Green Mizoram Day hman nise an ti.
Chief Minister chuan Green Mizoram Day-a thing ṭiak phunte a puitlin ngeina turin enkawlzui a pawimawh hle a ni a ti a. Mi inthlahdahte avang leh lo hal vang bakah roadside reserve te ngaih pawimawh tawk ṭhin loh avangin kangmeiin a tichhe thin chu a pawi thei hle a ni a ti a, mi tam zawkin tunah chuan humhalh nachang an hre chho ta chu a lawmawm hle a ni a ti.

Meeting chuan kumin 2015 Green Mizoram Day thupui atan ‘I dam khaw-chhuah nan thing phun rawh’ tih a thlang a. Tun thla ni 11-ah Hmuifang Tourist Complex ah hman tur an ti a, hemi ni hian district dang zawngah pawh hmang ve tura beisei an ni.

Thing ṭiak phun tur chu a leilung leh sik leh sa ngeih tur chi Environment & Forest department-in thlang se an ti a,  heng bakah hian State Level on Green Mizoram Day hian district levela kumin chhunga kangmei ven hna thawk tha dist 3 te hnenah ‘Fire Prevetion Award 2015’ hlan nise an ti bawk a. District levelah pawh district huam chhung theuha khaw ti tha zual pathum thlangin lawmman pawh hlan ve se an ti bawk a ni.

Green Mizoram Day hi kum 1998 atanga kumtin hman thin a ni a. Kum 1999 – 2014 chhung khan thing ṭiak 36,06,302 phun tawh anih thu meetingah hian tarlan a ni a. Thing ṭiak phun ṭhenkhat a puitlin loh chhan bera hriatte chu lo hal vanga kangmeiin a tih chhiat, kawngpui leh hmasawnna dang dang siam vang, enkawlzuina tha tawklo leh thing tiak thlan fuh loh vangte nia tarlan a ni bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram