Bru laklet tur te Mizoram mi diktak an nih leh nih loh Kaskau Camp-a endik ni hnuhnung nimin khan inlan an la awm chuang lova, hei vang hian Kaskau camp aṭanga Mizorama let tur an awm dawn lo a ngaih a ni.
Home Department Addl Secretary Pu Lalbiakzama sawi danin, Bru lalet tura ruahmanna siam sa chu zawm a ni tho dawn a, tun thla ni 8 aṭanga Bru laklet hna thawk turin Mizoram mi dik tak te endik hna chu Tripuraa Kaskau Relief Camp-ah ṭan a ni a, hemi atan hian Mizoram sawrkar official te an kal a, amaherawhchu ni 3 chhungin inlan an awm lo a, niminpiah khan Bru hruaitute chuan an thil phutte Mizoram Official te hnenah an theh lut a. An lehkha hi Mizoram sawrkar, Tripura sawrkar leh National Human Right Commission(NHRC) ah te a copy an pe a ni.
Tripura Bru Relief Camp 6-a Mizoram Bru awmte hi a intahtawlin laklet an ni dawn a, Bru laklet tura ruahman hi naupang 11,446 leh puitling 9,264, an vaiin mi 20,710 vel ni tura rin a ni a; chhungkua 3,455 vel bawr awm tura ngaih a ni.
Tripura camp hrang hranga Bru awm te Mizorama laklet hna Road Map I-III hnuaiah nikum November 2014 thleng khan mi 6649 lak kir an ni tawh a, Sawrkar laipui ruahmanna angin kum 1997 aṭanga mahni duhthu ngeia Mizoram chhuahsan, Tripura chhung khaw hrang hrang awmhmun khuar te hruaikir hna thawh 7-na leh a tawp ber ni tur chu kalpui mek a ni a, hruaikir turte hi Mizoram khua leh tui dik tak an nih leh nih loh kum 1995 electoral Roll behchhan a endik hmasak vek tura tih an nih angin endik hna hi tunkar Thawhlehni aṭang khan thawh ṭan tura ruahman a ni.