Kum 2013, June thla aṭanga vawiin thlengin Kelkang khuaa harhna thleng chhim tura kal mi engemawzat an la awm reng a, hemi avang hian Kelkang chhung tlem awmna khua a ekin te chu a khatin, inthiarna mumal neilo an awm tawh avangin Mizoram sawrkar chuan NLUP sum bank a dah pun hmangin hma a la mek zel a, Sawrkar chuan hriselna lam atan a hlauhawm thei dawn a a hriat avangin inthiarna mumal zawk a awmtheih nan ṭanpuina dang dang NLUP sum bank a dah pun hmangin hma a lak mek zingah ekin 200 sakna a siam a.
Champhai DC Pu H. Lalengmawia, chuan Kelkang ekin 200 sakna hnatlang thei tur mi tlawmngai an mamawh thu a sawi a, chumi chu chhang nghalin niminpiah khan Cham-phai Zotlang Presbyterian koh-hran aṭangin mi 36 in ekin khur laih hi an ṭan nghal a, nimin khan Champhai Venglai Presbyterian kohhran aṭangin mi 100 chuan tlawmngaiin ekin khur laih hna hi an chhunzawm bawk.
Tunhnai a Home Minister in Kelkang a tlawh ṭum khan mipui hriselna atana ṭul nia ngaiin an ekin khat tawh paih fai hnathawh nise a tih chu Aizawl Municipal Council hotuten ngaipawimawhin Kelkangah Cess Pool (Ek Paihna) khawl pathum thawn chhovin, thenfai hna hi an thawk a, Septic tank pangngai a nih loh vangin harsatna awm tura an ngaih laiin Thawhṭanni khan ekin 24 chu fai takin paih faisak an ni chu khawtlang hruaitute an lawm hle a ni.
Tui harsatna sutkian nan pawh NLUP a thawktuten Kelkang aṭanga Km 1½ chauha hla Dilkawn a mi tui chawi theih nan JCB (Excavator) hmangin kawng an lai ṭan bawk.
NLUP thawktute chuan tuizem 30 a hmunah hian an thlen chho tawh a, hengte hi V/C leh khawtlang hruaituten an sem nghal a ni.
Kelkang khaw harhnaa mikhual leh a tualchhung mite harsatna sutkian nan hian mi ṭha-hnemngai ten thil tam tak an thawh avangin Kelkang khaw-tlang hruaitute an lawm hle a ni.