Thenzawl-a Handloom Project din tum Union Minister hnenah thlen

SERCHHIP: Pu H.Rohluna, Industries Minister, Delhi-a cham mek chuan Union Textile Minister Santosh Kumar Gangwar a hmu a, Pu H.Rohluna hian Thenzawl-a Handloom Project cheng vaibelchhe 8 senna din tum chu Union Minister hnenah hian a thlen a, he project hi hun remchang hmasaah Chief Minister-in a hawng dawn tih sawrkar thuchhuah chuan a tarlang.
Pu H.Rohluna hian Union Textile Minister chu Mizoram-a Handloom tihhmasawnna tur kawng hrang hrang a sawipui a. Tuna hmalakna kal mek Weaver’s Service Centre Chaltlang a mi hawng turin a sawm a, July 3, 2015 a Aizawl-a lo kal a, rawn hawn a remtih thu Union Minister hian Pu H.Rohluna chu a hrilh a. He centre hi Chaltlang-a ZOHANCO building-ah bul ṭanin floor hnih luah phawt a ni dawn a, Guwahati aṭangin khawl chah chhoh a ni dawn a, training chi hrang hrang design training te leh puan dum te thlengin zirtir an ni dawn a ni.

Industrial Growth Centre Luangmual-a Incubation centre for apparel manufacturing  cheng vbch 20 senga dinna tur lungphum pawh Union Textile Minister hian  phum a remtih thu Pu H. Rohluna hi a hrilh a, July 3,2015-a a lo kal hunah hian he lungphum hi a phum nghal dawn a ni. He  Incubation Centre dinna senso hi a zavaiin sawrkar laipuiin a tum tur a ni a, hemi atan hian Mizoram sawrkar chuan ram an mamawh 1.5 acre a pe a, NBCC in an thawk ṭan tawh a ni.

Teacher Education lamah School Education Minister ni bawk Pu H.Rohluna hian SCERT hnuaia DIET 8-a thawk-tute hlawh MHRD in sum a pek chhuah mai loh avanga har-satna awm reng chu Anamika Singh Director Teacher Education MHRD  hmuin chinfel a ni a. December 2014 aṭanga thawktuten hlawh an lak theih loh reng chu an la thei dawn ta a,  hemi atan hian Kum 2014-15 chhunga MHRD in a tum tur 2nd installment cheng nuai 820.09 chu release nghal a ni a, sanction order pawh Director, Teacher Education  hian Minister kutah hian a hlan nghal a ni.

Pu H.Rohluna hi Delhi-ah a la cham mek a, nimin lam khan CSS hnuaia Hindi teacher 1305 hlawh a buaipui leh tih sawrkar thuchhuah chuan a tarlang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram