Mizoram sum hmuh tur la chian loh vangin Assembly Session-ah Budget puitling pharh thei dawn lo

Finance Minister Pu Lalsawta chuan Assembly inkhawm lo awm leh tura Budget puitling pharh theih a nih leh dawn loh chhan chu kumin atana Mizoram sum hmuh tur a la chian loh vang a ni a ti.
Thlaleh ni 7 aṭanga Assembly inkhawm ṭan turah hian Budget puitling pharh theih a inbeisei thu Pu Lalsawta hian March thlaa Assembly inkhawm-ah khan a lo sawi tawh a. Mahse, tunah hian thla 3 emaw atana sum hman tur Vote-on-account-a Assembly phalna a dil leh a ṭul dawn niin a sawi a. Hei hi kumin sawrkar kum kal lai (2015 -2016) chhunga Centrally Sponsored Scheme (CSS), NonLapsable Central Pool of Resources (NLCPR) leh North Eastern Council (NEC) hnuaia sum lo kal dan tur sawrkar laipuiin a la tihchian theih loh vang a nih thu a sawi.

Central sawrkar thar hian sawrkar laipui ruahmanna hrang hrang thawhna atana state sawrkar tum ve tur a tidanglam nasa hle a. Finance Minister chuan hriat theih zingah Agriculture Department hnuaia CSS sum hmuh za zela 10 state sum ve ṭhin chu za zela 50 tum tawh tura hriattir an nih avangin, hei hi an tlin ve theih loh thu an hrilh tawh tih a sawi a. SSA sum za zela 10 state tum ve ṭhin pawh a vaia Central tum vek tawh tura tihthluk a nih hnuah a ngai bawka kalpui leh tura tih a nih thu a sawi bawk.

ṭawngkaa inbiakna aṭanga hriat theih chinah state tum ve tur hi a tlangpuiin a pung lam zawk a tam hmel a, hetiang dinhmun a nih avang hian Mizoram te ang Special Category State an lo nih ṭhinna chuan awmzia a nei talo nia ngaih theih a ni tih sawiin, hetiang anga kalpui a nih chuan state pachhia te chuan kalphung tharah harsatna namen lo an tawk dawn niin a sawi a ni. Kumin chhunga project hrang hrang kalpuina tur CSS, NLCPR leh NEC te atana sum awmdan tur hi Agriculture Department tih lovah chuan ṭawngkaa thudawn bak state sawrkarin a do vena tur zat hi central ministry hrang hrang te’n an la tichiang thei lova. CSS, NEC leh NLCPR atana sum hmuh turte hi department-te aṭanga ruahman ṭhin a ni a, chhut chhuah theih a nih tak loh avangin Budget pangngai tur hi chhut theih a ni ta lo a ni.

Planning Commission thlaktu NITI Ayaog chuan a hming put angin a kalphung leh ruahmanna kalpui kawng-ah Planning Commission kal-phung tidanglamin sate bil din-hmun ngaihtuah lovin ram pum huap kawng hrang hranga hma-sawnna tur ngaihtuah zawngin a kal tawh dawn nia a lan thu Pu Lalsawta chuan a sawi a. Hemi kawngah hian tun hma aiin ram tan thil ṭha tamtak a phurh chhuah a rinawm thu a sawi a ni.

Hetihlai hian NITI Ayaog hmalak dan tur hi tun thlengin hriat chian a la nih loh avangin, state in sum a hmuh dan tur pawh hriat theih a la ni lova. Budget pangngai hi chu kumin October emaw November-ah emaw chauh pharh theih beisei a ni. Hetiang bawk hian nikum khan budget pangngai chu November thlaah chauh pharh theih a lo ni tawh bawk a ni.

Naktip hian Speaker Pu Hiphei kaihhruai Business Advisory Committee chu an ṭhukhawm dawn a, thla thar ni 7 aṭanga ṭan tur Assembly inkhawm hun hman dan tur kimchang an duang dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram