Political party thar Revolutionary Democratic Party (RDP) tia vuah Mizoram Information Commission-a Chief Information Commissioner hlui Pu Robert Hrangdawla kaih-hruai chu din a nih thu puan a ni.
RDP din a nih thu hi Inrinni khan Aizawl-a Grand Hotel-ah he party thar hruaitute hian an puang a, Hruaitu an inruat chin chu Vice President-ah Aizawl Municipal Council (AMC) a Executive Councillor ni lai Pi Hmingthanzami leh General Secretary 2 – C. Lalthanmawia leh Vanlalhruaia te an ni a. Hruaitu dangte chu la ruat belh tura ruahman a ni.
Revolutionary Democratic Party hruaitute chuan an din chhan chu Mizorama Party awm sate chu ram leh hnam himna chungchanga an duhkhawp loh vang a ni tih an sawi a, an party innghahna atan Mipui rorelna Democracy dik, Ram leh hnam humhalh leh Zofate insuihkhawmna leh inpumkhatna neih tih an hmang ang. RDP chuan buh leh bal chu hmasawnna bul ṭhutah pawmin intodelh chu an ngai pawimawh dawn tih an sawi.
Revolutionary Democratic Party hian an thupui atan ‘Ram hi Lalpa ta a ni, huai takin awm la, ti mai rawh’ tih a ni a. An Symbol atan Buhvui hmangin, hei hian buh leh bal a intodelhna kawkin, an party puanzar rawng eng chu vaukhanna (warning)entirna a ni tih an sawi bawk a ni.