MZP-in Aizawl-a ICICI Bank an khârsak

SERCHHIP: Nimin khan Mizo Zirlai Pawl (MZP) chuan ICICI Bank, Zarkawt, Aizawl a mi chu chhan hrang hrang vangin a kharsak.
Nimina MZP thuchhuahin a tarlan dan chuan ICICI Bank hi Mizote tan dawr an harsat ṭhin bakah Mizo ṭhalaite tan PMEGP Loan an pe duh ngai lo a, Student loan an pekchhuah ṭhat ngai loh vang te, Document fel sa vek pawh chhuanlam ho lam tak tak siamin loan an pe duh ṭhin lo tih an sawi a, Margin money (30%) Central sawrkarin a tum theih hun chhung a zawh hnuah margin money tel lovin an pek theih loh thu an sawi vangtein Bank hi kharsak an ni tih an sawi a, MZP chuan Mizo ṭhalaite leh zirlai tam zawkin awlsam zawka PMEGP loan leh Student loan an pûk theih dan tur chungchang sawipuiin Mizoram chhunga Bank hrang hrangte meeting a lo neihpui tawh a, meeting-ah hian Bank hrang hrang aiawh ṭha taka an kal laiin tuna kan kharsak tak; ICICI, Aizawl Branch aṭangin tumah an kal ve lo a, MZP chuan mak a tiin, a hrethiam lo hle a ni, an ti bawk.

Nimin chawhnu lam khan ICICI bank thuneitu sang lam leh MZP hruaitute hian inbiakna an nei a, ICICI Bank thuneitu sang lam hian an bank aṭanga Mizo ṭhalai leh zirlaite loan dilte hnenah pek chhuah nghal an intiam a, hemi a nih avang hian MZP chuan lungawilohna an lantir chu tihtawp lailawk a, an intiam anga loan hi an pe chhuak nghal lo a nih chuan MZP chuan a ṭul angin hma la chhunzawm leh dawn a ni, an ti bawk.

Tun ṭuma ICICI Bank kan kharsak hi anmahni leh mimal inhuatna vang a ni lova, ICICI ngei pawh hian Mizo mipuite tana chak leh ṭha zawka hna an thawh a. Loan chungchang-ah pawh an inhawn zau leh zual theihna tura nawrna pakhat a ni tih MZP chuan an sawi a, Mizo mipui, ṭhalaite leh zirlai hmakhaw ngai tak chunga kharsak an ni tih chu ICICI Bank thuneitu leh a thawktu zawng zawng leh Zoram mipui ten hriatsak se an duh tih an sawi a, Mizoram chhunga Bank hrang hrangte chu Mizo mipuite tana inhawng zau leh zual turin MZP chuan a ngen a, chutihlai chuan Mizote tana dawr har tak leh loan pawh pe chhuak ṭha duh lo Bank te chu na takin MZP chuan a do zel dawn a ni, an ti bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram