SERCHHIP: MZP Executive Meeting nimina MZP Pisa puia neih chuan tunlaia sawi hlawh tak Yoga zirtirna chungchang ngaihtuahin Yoga zirtirna zirlai-bua lak luh tumna awm mek chu ṭha lo an tih thu sawiin, sawrkar laipuiin ruahmanna siama sawrkar laipui enkawl zirna inah te Yoga zirtirna kalpui tura hmalakna awm mek pawh ṭha lo an tih thu an sawi a, Mizoram chhunga sawrkar laipui enkawl zirna in te chu Yoga zirtirna kalpui ve lo turin MZP chuan a ngen a, sawrkar laipuiin tihluihna hmanga Yoga zirtirna kaltlangpui a tum lui a nih chuan MZP chuan theihtawp chhuah in a do zel dawn a ni.
Yoga chungchang zirlaibu ah lakluh tumna awm mek chu Mizo Kristian zirlaite tan MZP chuan him lova ngaiin tihhlawhtlin a nih lohna turin theihtawp chhuah a ni dawn tih an sawi a, Yoga hi Hindu sakhua serh leh sâng pawimawh tak niin, Hinduism Orthodox paruk zinga pakhat a nih avangin Kristian te tan chuan a him lo hle a. Yoga dodal a, Mizo mipui ten an zawm lohna tura ṭangrual turin Mizo mipui zawng zawngte a sawm a. Mi puitling chin nia kan ngaihte pawhin Central sawrkarin sum tawktarhah a lo hmang a nih pawha lo sawimawi a, Yoga zawm tura midangte ziritirna pe lo turin MZP chuan a ngen nghal a. Sum leh paia hlawkna tur leh mimal hamṭhatna aia Kristian te thurin dah pawimawh hmasak hi kan hnam tana him zawk tur a nih avangin Yoga chung-changa inhnamhnawih lo turin MZP chuan zirlaite leh Mizo mipuite a ngen nghal a ni.
Hei bakah hian MZP rorel-na sang – Federal Council Sitting-in, “Mizo Zirlaite tan hnam-dang nupui/pasal nei lo tura inzirtirna leh intiamkamna Ni siam ni rawh se” tia a lo rel tawh chu intiamkamna ni tur chung-chang an rel a, Mizo Zirlaite tan Hnamdang nupui/pasal nei lo tura intiamkamna Ni atan hian Semtember ni 2, 2015 (Nilaini) chu ruat a ni a. September ni 2 hi kumtin Mizo zirlaite tan hnamdang nupui/pasal nei lo tura inzirtirna leh intiamkamna Ni-a hman chhunzawm turin MZP Calender-ah dah nise meeting chuan a ti bawk a ni.