Naktuk atangin Mizorama Tuikuk lâklet tur te enfiah tan an ni dawn

North Tripura relief camp 6-a Bru awm laklet tur atan vawiinah Mamit-ah ruahmanna kimchang inhrilhhriatna hun hnuhnung hman a ni ang a, Thawhlehni aṭangin Mizoram hnaih bera awm Kaskau camp-a awmte enfiah ṭan a ni ang.
Home department Additional Secretary Pu Lalbiak-zama sawi danin vawiin hian Home department OSD Pu David H.Lalthangliana hovin Bru laklet kawnga mawhphurtu officer-te chu an ṭhukhawm ang a; a tuk leh aṭangin Kaskau relief camp-a Bru chhungkaw awmte Mizoram mi dik tak an nih leh nih loh enfiah a ni ang a. Mizoram mi diktak nia finfiahte chu karleh Thawh-ṭanni, June ni 8 aṭang khian laklet ṭan an ni dawn a, hei hian ni 5 chhung awh tura ngaih a ni.

Hetihlai hian relief camp-a awm Bru laklet tura ruahman te hi Mizoramah an vaiin an kir duh ang em tih hriat a la ni lova. Mizoram Bru Displaced People Forum (MBDPF) President Pu A. Sawibunga chuan kir leh kir loh chungchang chu an mipuite kutah an dah tawp niin a sawi.

Pu Sawibunga chuan laklet duh zat leh duh loh tur zat chu sawi thiam a harsa a tih thu a sawi a. Sorkarin an thil phut a tihhlawhtlin chin leh la tihthlawhtlin loh chinte bakah sawrkarin ruahmanna a siam a hrilhfiah dante chu an mite hnenah kimchang takin an hrilh chhawng niin a sawi a. An pawl leh tlawmngai pawl dangte pawhin kir tur emaw kir duhlo emaw zawngin engmah thuchhuah an siam lova. An pawl, MBDPF chuan an mipuite duhthlannaah an dah tawp mai niin a sawi a ni.

Bru laklet tura ruahman chhin hi naupang 11,446 leh puitling 9,264, an vaiin mi 20,710 vel ni tura rin a ni a; chhungkua 3,455 vel bawr ni tura ngaih a ni. Laklet an nih hnu-ah Mamit District-a inbengbel tur an tam ber a, chhungkaw 2,594 an ni a; Kolasib District-ah chhungkaw 628 leh Lunglei district-ah chhungkaw 233 te dah tura ruahman a ni a. Mamit district-ah hian khaw hrang hrang 48-ah inbenbel tir an ni ang a, Kolasib district-ah chuan khaw 8 – Bairabi Awrpuar Veng, Meidum, Pangbalkawn, Zodin, North Thinglian, South Chhimluang, Dilzau leh Bukvannei-ah te dah an ni ang a. Lunglei district-ah chuan khaw 5 – Buknuam, Putlungasih, Zohmun, Chawilung South leh Dinthar-ah te dah an ni ang.

Tun ṭuma Bru laklet hna thawhna senso atan hian Mizoram sorkar chuan sorkar laipui-ah cheng vaibelchhe 68 leh nuai 60 chuang a dil a. Hemi aṭang hian cheng vaibelchhe li leh nuai 70 a rawn pe chhuak tawh a, tunah hian Bru laklet hna thawhna atana hman turin Finance Department lamin an buaipui mek a ni.

Mizoram tlawha lo zin Union Minister of State for Home Pu Kiren Rijiju chuan Bru te hi an lokir duhlo a nih chuan tihluih theih an nih loh thu a sawi a. MBDPF leh Bru camp-a pawl hrang hrangin chhungkaw khat sum dawn tur cheng nuai khat leh sing nga-a tipung tura an phut chu sorkar laipuiin tihpuitlin sak a tum loh thu sawiin tuna an dawn hi a tawkah a ngai tih Thawhlehni zan khan chanchinbumite a hrilh a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram