Serchhip : Sawrkar kum liam ta (1st April, 2014-31st March, 2015) chhung khan JN Hospital Serchhip Blood Bank-ah thisen Unit 473 pek a ni a, heng zinga Unit 376 hi mi tlawmngai ten damlo a mamawh apiangte hman atana an pek niin kumkhat chhung hian Blood Donation Camp tum 11 neih a ni.
Serchhip Blood Bank-in an chhinchhiah danin sawrkar kum liamta chhung khan JN Hospital Serchhip Blood Bank-ah hian Kohhran ṭhalai pawl ten thisen ṭum 7 pein heng ah hian mipa 206 leh hmeichhia 37, an vaiin mi 243 ten thisen an pe a. YMA hminga thisen pek ṭum 2 awmah mipa 28 leh hmeichhia 3, an vaiin mi 31 ten thisen an pe a. Zirna In hminga thisen pek ṭum khat awmah mipa 19 leh hmeichhia 5 te thisen pein pawl dang hminga thisen pek ṭumkhat bawk awmah mipa 21 leh hmeichhia 4 ten thisen an pe bawk a ni. Hemi hun chhung vek hian pawl hming ni lova mahni-a Blood Bank-ah kala a mamawh apiangte hman tura thisen pe mipa 49 leh hmeichhia 4, an vaiin mi 53 awmin mi tute emaw tan bika thisen pe (Replacement Donation) mipa 94 leh hmeichhia 3, an vaiin mi 97 an awm bawk a ni.
Sawrkar kum liamta a thisen pek zawng zawng aṭanga damlo ten a thlawna an hman theih tura thisen pek (voluntary) hi 79.49% niin, Replacement Donation hi 20.50% a ni thung a ni. Sawrkar kum hmasa (2013-2014) chhung khan JN Hospital Blood Bank-ah hian thisen Unit 678 pek a ni a, heng zinga Unit 660 (97.34%) hi Voluntary-a pek niin Replacement Donation hi Unit 18 (2.65%) chauh a ni a. Tun sawrkar kum liamta a damlo te tana a thlawna thisen pek nasa taka a tlakhniam chhan hi hun rei tak chhung Blood Bag lama harsatna a awm vang a ni ber nia thudawn a ni.
Nikum sawrkar kum chhung-a tlawmngaia thisen pe pawl hrang hrangte hi Inrinnia World Blood Doners Day hmannaah hian Association for Voluntary Blood Donation (AVDB) Serchhip District kaltlanga thisen pe ṭhintute, Serchhip khawpui chhung leh pawn a Kohhran leh Tlawm-ngai Pawl hrang hrangte hnen-ah chawimawina thuziak (Citation) pek/hlan an ni a, Pu ZD Lalmuanawma District Medical Superintendent (DMS) in thi-sen pek hlutzia thu a sawi bawk.
World Blood Doners Day hmanna programme zawhah hian JN Hospital Serchhip Blood Bank a dah turin mi tlawmngaiten thisen unit ṭhahnemtak an pe leh nghal bawk a ni