Scientist te chuan hmeichhia, pheikhawk ke-artui sang lutuk bun ṭhin te hian Morton’s neuroma an vei duh an ti a, he natna awmdan chu chemte hriam tak rap ang hian an inhre ṭhin a, an kal ṭha ngam lo ṭhin niin an sawi.
UK-ah chuan Morton’s Neuroma vei hi kum 10 kal ta ai khan a letin an tam tawh zawk a, hei hi a chhan tam zawkah chuan pheikhawk ke-artui sâng lutuk bun vangah zirchianna neitute chuan an puh a ni.
He natna vei tam ber hi kum 40 leh 69 inkar an ni a, kum 2004-05 khan hetiang natna vei damdawi ina an enkawl zat chu 1,179 an ni a, nikum, 2014-15 chhung khan 2,532 an tling a, an punna hi 115% lai a tling a ni.
Zirchianna neitute chuan he natna hian ke zungṭang kara nerve a khawih a, heng nerve-ah hian timur a siam a, chu chuan an ke zungṭangah chuan chemte hriam tak rap anga hriatna a siam niin an sawi a, pheikhawk ke-artui sang 5cm aia sang bun zingah hetiang natna nei hi an tam zual tih an sawi.
Andrew Craig, orthopaedic research fellow at Bradford Teaching Hospitals NHS Foundation Trust chuan damlo zinga zaa 55 te chu zai an ngai tih a sawi a, an ke zung ṭang bawr vela hriatna thazam te chu paih a ngai ṭhin niin a sawi a, an hriatna thazam an paih hnu hi chuan an ke hmawr vel chuan engmah hriatna a nei tawhlo tih a sawi a, a la nasa lo deuh te chu Insoles leh Steroid injection hmang te pawhin an enkawl ṭhin tih a sawi bawk.