SERCHHIP: Ruihhlo ngaite chhanchhuah leh enkawl kawngah sawrkar leh YMA in thawhho an remti.
Hmeichhe hum sual dai leh ruihhlo ngaite chhanchhuah leh enkawl kawngah Central YMA hruaitute’n nimin khan Social Welfare Minister, Pu PC Lalthanliana chu a pisa-ah an hmu a, tunlaia ruihhlo an do thar leha an thil hmuh leh tawn hriat te hrilhin, zana khawlaia hmeichhe chetla leh nun kawng dik lo zawh an tam thu te, ruihhlo ngai, awmna mumal nei lo an tam thute sawiin, heng mite tan hian Synod nen ṭangkawpa Camping buatsaih an tum thu te, Camping chu kar 3 awh chauh a nih dawn avangin a hnu-a enkawl zui kawngah sawrkar nen an ṭan tlan loh chuan an nun ngaia an kir leh ṭhin dan te, heng mite enkawl zuina leh an thawh awm tawk an thawh theihna tura ruahman sak thei se an duh thu te an hrilh a ni.
Pu PC Lalthanliana chuan, tlawmngai pawl hrang hrang te leh sawrkar chu ruihlo do kawngah leh ruihlo bansan tawhte enkawl zelna kawngah an thil tum inang mahse kawng hran ṭheuhva hma an lak chuan an thawhrimte a lo thlawn ah a kalral mai ang tih a hlauhthawnawm thu a sawi a. Ruihlo ngai ṭhin sim tum ten kawngdik an rawn zawh leh turin kohran, tlawmngaipawl leh sawrkar te’n huang khat a hna an thawhho a ṭul a ni a ti a. CYMA hmalakna chu fakin an hmalkna hrilhhre ṭhin tur leh an thawhhona chungchangah te sawihona la neih chhoh zel tha a tih thu a sawi a, YMA hruaituite’n hmeichhe hum sual dai leh ruihhlo ngaite nun sim tir an tum mek dan chu ropui a tih thu a sawi a, YMA-in an enkawl ṭhat chhuahte lo enkawl zui kawngah sorkar in tih tur a nei a nih chuan tlanchhiat an tum loh thu a sawi.
Minister chuan, YMA duty-in an man te chu Home-a dah luh an ngaih chuan chung mite awmna tur chu sawrkar in a lo ruahman ang a, Home-a awm thei zat bituk aia tam awm a ngai a nih pawhin sawrkar chu dan bak pawhin a kal thei a ni a ti a, Camping-a chhuakte enkawl zui nan Thingsulthliaha PISGAH Home chu sawrkar-in a ruahman tur thu a sawi.
An sawihonaah hian Social Welfare Department hotute pawhin Home an enkawlte leh a awm theih dante an sawi fiah a, tlawmngai pawl leh police-in mi an man, Home-a dah te chu dan hmanga lak chhuah leh mai ṭhin an nih thu sawiin, YMA-in dah luh duh an neih chuan police kaltlangin Immoral Traffic Protection Act hmanga man ni se an ti bawk.
He sawihonaah hian hmeichhe hum sual dai leh ruihhlo ngaite enkawl zui kawngah health department pawh dawr ni se, Chief Minister pawh sawipui ni se an ti bawk.