Serchhip-a Primary School hmasa ber, Serchhip Kawnpui Primary School tihral tuma hmalakna an duhlo tih nimin kalkhawm, Serchhip-VII Village Council huamchhunga tlawm-ngai pawl hrang hrangte chuan an sawi.
Thudawn danin Serchhip SDEO chuan tun thla ni 3 khan Office Order tichhuakin Serchhip SDEO hnuaia School 8 te chu School 4-ah dah-khawm tura tih a ni a, heng zingah hian Kawnpui Primary School chu Hmar Veng Primary School-ah dah tura tih niin, School bungrua te pawh vawiinah hian bialtu CRCC te nen chhinchhiaha SDEO Office-ah thehlutin School building hi kalha Chabi pawh CRCC te kaltlanga SDEO-a pelut tura tih an nih bakah zirtirtu thawkte pawh vawiin aia tlai lova SDEO Serchhip-ah Joining Report pe vek tura tih an ni.
Hemi chungchang hi nizan hmasaa Serchhip-VII huam chhunga tlawmngai pawl hrang hrang 7 leh Serchhip-VII VC ṭhukhawm chuan ngaihtuahin hetianga Serchhip Kawnpui Primary School tihtawp tura ruahmanna awm chu ṭha an tilo tih sawiin, he School tihtawp pawh an remti lo tih an sawi a. He Order pawh hi sut leh turin nimin khan SDEO Serchhip hi an ngen nghal bawk a ni.
Thudawn danin Kawnpui P/S ah hian nikum lam khan naupang 17 an awm laiin kumin hian naupang 34 admit an ni.