Sawrkar laipuiin New Education Policy duan a tum mekah thupui thlanchhuah hmangin nimin khan SCERT Auditorium-ah NERIE Shillong buatsaihin Consultation Meeting neih a ni a, School Education Secretary Pi
Manisha Saxena chuan khuallian niin a hmanpui.
Pi Manisha Saxena, Commissioner & Secretary, School Education, Mizoram chuan zirna hian hmunzau taka an tih theih thil zirte an thiamna bakah an mahni local knowledge an neih zau leh zual theihna turin
recommendation siamnaah ngaihtuah tel ni se tiin tunah chuan khawvel a zim tawh a, engpawh hi awlsam taka hriat zung zung a awl tawh a, hetiang hmachhawn thiam tur hian kan naupangte thuam that a ngai bawk a ni a ti.
Nimin khan School Education atana thupui thlanchhuah 13 zinga thupui 11 hmangin consultation hi neih a ni a, NERIE Shillong atanga mithiam lo kalten heng thupuite hi an sawihawn hnuah sawihona hi neih zui a ni.
Consultation-ah hian IASE a mithiam thenkhatte, University leh College a thawk thenkhatte, School Education Directorate-a Deputy Director leh a chung lam te, District tina DEO leh SDEO zawng zawngte, SCERT-a
officer te, RMSA leh SSA Officer te, DIET a Principal te, zima lama mi challang leh Teacher Association hruaitute leh zirlai pawl hruaitute an tel a ni.
Kum 1986 khan National Policy on Education chu duan a ni a, chu chu kum 1992 khan siam danglam leh a ni. Hemi atang hian zima kalphung ennawnna atan vawi engemaw-zat tihdanglam a ni a. Sawrkar laipui chuan
National Education Policy hi zima tha, zima tih-danglam leh zir zau zelna atan te mipui mamawh danglam zel phuhru tur zawnga phurh chhuah hi a duh dan a ni a, zirlaite an mamawh thiamna leh hriatna pek leh science,
technology, academics leh industry a mihring indaih lohna tibova, India ram hi hriatna chung-chuang neihtir a tum a ni. Hemi atan hian sawiho tur thupui hlawm lian tak tak 33 chu thlan chhuah a ni ta a. Heng thupuite hi
hlawm hnih – School Education atan 13, Higher Education atan 20-a then a ni.
Meeting hi Pu K.Lalthawm-mawia, Director, School Education, Mizoram in a kaihruai a, New Education Policy chungchanga zirtirna rawn pe tur hian NCERT, New Delhi atangin mithiam pakhat leh NERIE, Shillong
atangin mi 3 an lo kal a, School Education huamchhunga sawikhawm tur (theme) 11 te uluk taka zir ho a ni
Jun 18, 2015 khan Art & Culture Auditorium Beraw-tlang-ah District tina School Education Officer kokhawmin School Education Minister hovin New Education Policy chungchangah hian Consultation neih a lo ni tawh
bawk.