Aizawl-ah Parking Fee tipung dawn

Aizawl Municipal Council chuan thla thar ni 1 aṭangin kawngsira motor hun man a tipung dawn a, motor hunna hmun a zirin parking fee hi a lêt hnih te a aia tam ten tihpun a ni.

Hemi chungchangah hian AMC Executive Councillor Parking changtu Pu Rosiamngheta chuan parking fee tihsan chu motor chhuak tlem tura an beisei vang niin nimin khan Aizawl Press Club-ah thuthar lakhawmtute a hrilh
a, tunlai khawvel ah, “Mipui che chhuak sela motor chu lo ding rawh se” tih chu thupui a nih tawh avangin, lirthei lo pung chho zelah mipui tana awlsamna siam turin lirthei control turin Parking Regulation hman a ni a ti.

Pu Rosiamngheta chuan Parking fee chu chhun leh zan a hranga pek tura an ruahman thu a sawi a. Zan lam motor park chungchang chu Local Council enkawl tura dah a nih tur thu a sawi a. Hmun lun lai bik-ah Hot zone
siam a ni dawn a, heng hmunah te hian parking fee tihto lehzual a ni dawn a, Hot zone hi Temple Square aṭanga Chanmari kawng dung bakah Bara bazar bul vel te a ni a, hmun lun lai apiangah lirthei hun man a to dawn a,
darkar 1-ah Rs.20 a ni ang a, darkar tinin Rs.10/- zelin a pung dawn a ni.

Pu Rosiamngheta chuan sawrkar office zawng zawngte pawh anmahni compound chhunga an dah lova, an ram chin baka Motor an dah chuan dan angin parking fee an pe ngei tur a ni, a ti a. Zirlaite tan an Institution Valid
ID hmangin an Institution aṭanga feet 300 thleng-ah student concession za zela 50 pek vek an ni ang, a ti bawk.

Vantlang phur lirthei City Bus, Line Bus, Taxi, Maxi Cab, LPK, Pick up hian parking fee nilo in an stand fee an pe ṭheuh tur a ni a, Stand fee pe duh lote chu stand a an din awih a ni lo ang a ti.

Aizawl khawpui chhunga Motor nei zawng zawngte pawh mahni Garage siam a dah lut ṭheuh turin an ngen tih sawiin, AMC Executive Councillor chuan, kawngpui kam leh vantlang ram a motor dah thin te sim a ṭul thu a
sawi a. Parking fee chungchanga collector te complain duh chuan parking receipt nen complain theih a ni, a ti bawk.

Taxi stand thlan bikah Taxi tlanlai koh luhna Taxi waiting zone siam tum a nih thu a sawi bawk a.Transport/Goods godown Khawpui pawna insawn chhuak turin ngenna pek vek an ni, a ti bawk.

Pu Rosiamngheta chuan AMC-in khawpui chhung mipuite chetvel awlsamna turin Bus chak chi Green line Express hmun 6 chiaha ding tur siam turin Aizawl City Bus Owners Association (ACBOA) te nen hmalak mek a ni,
tih sawiin hun reilote chhungin hmuh thuai beisei a ni, a ti bawk.

Thuthar lakhawmtute kawmna-ah hian AMC Executive Councillor Lalrimawa leh Ram-hlunsanga te an tel a ni.

Aizawl Municipal Council hian Aizawl khawpui chhunga taxi stand awmsa hmun 7 ami te chu model pick up point atan a siamrem a, hengte hi bawngkawn (bustand bul) Chanmari, Dawrpui, vaivakawn (temple road leh
bustand hlui), Temple square , Thakthing , Kulikawn (kawnlai) te ani a. Heng model pick up point te hi mipui taxi hmang mamawh ten taxi ko penga phalna neia an chuanluh theihna hmun atana ruat bik an ni a, hei hi hmun
danga duh duh huna taxi phar dinga midangte harsatna siam pumpelhna tur atana ruahman chhin a ni, an ti.

Hetihlai hian, Aizawl Traffic Office chuan Aizawl khawpui huam chhunga zana dan lova kawngkama lirthei dahte dap chhuah hna a neih tawhah tun thla ni 12 thleng khan lirthei 943 an man tawh a. Aizawl traffic police atanga
thudawn danin lirthei man tawh zingah hian sum chawi tawh 412 an awm a, Fine la pelo mi 531 an awm a ni. Zana dan lova lirthei dah dap chhuak tur hian Local council area 55 tlawh chhuah tawh a ni a, local council la
tlawh loh 28 awmin hmabak la awm te chu tlawh chhunzawm zel tura ruahman ani.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram