SERCHHIP: Nimin khan Serchhip DC office chamber-ah Direct Benefit Transfer of LPG (DBTL) Scheme chungchang ngaihtuaha ṭhutkhawm a ni a, hetah hian District Bawrhsap Pi Juhi Mukherjee, IAS hovin Consumer Union hotute, Bank aiawh leh LPG Distributor ten tunlaia Gas cylinder la te Bank Account-a Subsidy a luh loh chungchang an sawiho.
Bawrhsap chuan nimina ṭhutkhawm hi kaihruaiin, DBTL Scheme avanga Serchhip District-in harsatna an tawh dan leh mipui lam aṭanga zawhna awm te Pu Rosangmawia DCSO-in a tarlang a, hemi hnuah hian zau taka sawihona hun hman a ni a; DBTL hnuaia Gas la te zinga mi ṭhahnem tak chuan an Bank Account a Subsidy a luh loh avangin an buai hle thu sawichhuah niin hemi chung-changah hian Bank lam hotute chuan mi ṭhenkhat Bank Account chu hun rei tak an khawih chet loh avangin a thi ṭhin niin an sawi a, chuvang chuan Gas Subsidy pawh hi an account chuan a dawng theilo nia an rin thu an sawi.
Bank account reng reng thla 6 chhung vel transaction vawi khatmah tih a nih loh chuan a thi ṭhin a, hemi tinung leh tur chuan transaction hi an tih ngei ngei a ngaih thu an sawi bawk. Consumer Union lam pawhin mipui te harsatna hrang hrang te tarlangin, Gas ngaihṭha taka lo la ve, an Bank account a pawisa a luh loh avanga mangang taka awm mek tam tak awm chu ṭha an tih loh thu sawiin, an harsatna te chu ṭang tlanga chinfel pui a ṭhat thu an sawi bawk a ni.
Kalkhawm te thutlukna angin Serchhip District Consumer Association te chuan thuchhuah siam nghalin Gas consumer Bank Account a Subsidy lut lo zawng zawng te chuan a rang lamin anmahni account neihna Bank ah Passbook nen kalin an account an tinung vek tur a ni a, account tinung tur hian pawisa tlem a zawnga an account a an dahluh emaw an lakchhuah emaw a ngai thung dawn a, Bank account an tihnun zawhah Gas Distributor te hnenah kalin an in report leh ang a, Gas Distributor te chuan chinfel sak an lo tum dawn a ni.