Microsoft chuan Windows thar an tlang zarh leh tur, Windows 10 chu Windows 7 chin chung lam hmang-tute tan a thlawnin a hman theih dawn tih an puang.
Microsoft chuan July ni 29 aṭang khan PC emaw, Laptop-a Windows 7, Windows 8 emaw Windows 8.1 hmangtute chuan a thlawnin Windows 10-ah an upgrade thei dawn tih an sawi a, Windows 7 Starter, Windows 7 Home Basic, Windows 7 Home Premium, Windows 8 emaw, Windows 8.1 hmangtute chuan Windows 10 Home-ah an upgrade thei dawn a, Windows 7 Professional, Windows 7 Ultimate, Windows 8 Pro emaw Windows 8.1 Pro hmangtute chuan Windows 10 Pro-ah an upgrade thei dawn a ni.
Hetihlai hian Windows XP chin hnuailam hmangtute tan erawh chuan a thlawnin a upgrade ve theih dawn lo thung a, Windows 10 an hmang duh a nih chuan a hrana an lei a ngai dawn a, Microsoft chuan Thawhṭanni khan an Windows thar man tur hi an tichiang tawh a, Windows 10 Home hi 119 (India pawisa chuan Rs. 7,500 vel) a ni ang a, Windows 10 Pro hi $199 (India pawisa chuan Rs. 12,600 vel) a ni dawn a, hei hi US-a a man zat tur a ni a, India leh ramdanga a man tur chu a dang ang a, India-a a man zat tur hi puan chian a la ni lo thung a ni.
Windows 10-ah hian Start Menu a rawn awm leh tawh dawn a, Windows 10 hi Desktop Computer atan chauh ni lovin, Windows Phone-ah pawh Windows 10 hi hman theih a ni dawn a, Windows Phone 8 hmang te tan Windows 10-a a thlawna upgrade theihna an pe dawn bawk a ni.
Windows 10 hmang chhin duh tan tunah hian Microsoft chuan an Website-ah Release Version download theihin an dah a, a thlawnin a hman theih rih a ni.