Bihar-a Muzaffarpur District Court chuan nimin khan Maggi siamtu Nestle company Official 2 leh Maggi faknaa inlan film star Amitabh Bachchan, Madhuri Dixit leh Preity Zinta te laka thubuai ziaklut turin Kazi Mohammadpur Police Station a hriattir a, a ṭul a nih chuan heng mite hi man turin a ti bawk.
Hemi chungchangah hian niminpiah khan lawyer Sudhir Kumar Ojha chuan thubuai a thehlut a, thubuai thehluttu Ojha chuan May ni 30 khan Lenin Chowk-a dawr pakhat aṭangin Maggi a lei thu leh a ei hnu-a a dam loh vangin he thubuai hi a thehlut tih a sawi a, thubuai hi IPC sections 270 (malignant act likely to spread infection of disease dangerous to life), 273 (sale of noxious food or drink), 276 (sale of drug as a different drug or preparation) and 420 (cheating and dishonesty) hnuaia ziahluh a ni.
Tunlai hian ramchhung chanchintharah Maggi chun-gchang hian hmun a luah lian hle a, Thla hmasa khan Uttar Pradesh FSDA chuan Maggi-ah hian a tihtuina an dah telah monosodium glutamate (MSG) tam tham tak pawlh a nih bakah dân phal chin bak lead a tel niin an sawi a, hemi chungchang sawi a awm avang hian Food Safety and Standards Authority of India (FSSAI) chuan state hrang hrang aṭangin test turin Maggi sample an lakhawm a, ni 2/3 hnu-ah test result hi an tihchhuah rin a ni. Kar kalta khan UP FSDA hian hemi chungchang-ah hian UP-a Barabanki local Court-ah thubuai an lo thehlut tawh a, hemi avang hian Amitabh Bachhan, Madhuri Dixit leh Preity Zinta te hi Maggi an fakna avangin he thubuaiah hian hnuhluh an lo ni tawh bawk a ni.
Heihlai hian Nestle hian February 2014-a an Maggi siam te an lakir leh a, hemi chungchangah hian Nestle chuan February 2014-a siam an lakkhawm leh chhan chu hemi huna siam Maggi-ten an ṭhat hun tur chhung bituk a pelh tawh vang niin an sawi a, tin Maggi-ah hian MSG an telh lo niin an sawi ve thung a ni.