Khawvel pum huap World Blood Donors day pualin nimin khan mite tana tlawmngaia thisen petute chawimawi an ni.
Tum 30 chuang a thlawna thisen pe Mipa 20 leh hmeichhe 3 te hnenah Lawmna entirna Certificate pek an ni a, Mipa zingah hian C Lalremruata Electric veng chu thisen pe tam tawh ber niin vawi 58 a pe tawh a, RC Rokhuma, Mission veng vawi 55 petu leh vawi 47 petu MS Pachuau, Sairang ten an dawt a, Hmeichhe thisen pe tam ber chu ṭum 40 pe tawh Rebecca Saimawii, Khatla a ni a, Zothantluangi Mission veng ṭum 39 petu leh Lalramthangi, Tuikhuahtlang tum 30 petu ten an dawt a ni.
Voluntary Blood Donors day-ah hian lawmman chi hrang hrang pek chhuah a ni a, heng zingah hian kum 2014-15 chunga Mizoram pum huapa thisen pe tam ber Presbyterian Central K|P chuan thisen unit 4176 an pe a, Religious category ah thisen unit 200 petu |KP, Coordination Committee chu pakhatna an ni a, YMA Category ah unit 161 petu Chanmari West branch YMA chu pakhatna an ni a, Zirna In zingah Pachhunga University Collge NSS chuan thisen an pe tam ber a, Unit 509 an pe a, pawl dang ‘Misce-lleneous category’ zingah Inter College Adventure club, thisen unit 142 petu chuan pakhatna an hauh bawk.
World Blood Donors day hi Pathianniah a tlak avangin nimin khan I&PR Auditorium-ah Mizoram State Aids Control Society (MSACS) huaihawta hman a ni a, Home Minister Pu R Lalzirliana chuan hmanpuiin, Mizote chu ṭhian chhan thih ngam mi huaisen an nih thin avangin, a thlawna thisen pek chu a Mizo mai bakah tun hun leh hun lo la kal leh zel turah Kristianna nunphung nen pawh midang tana inpekna a nih avangin a inrem hle tih a sawi ani.
He inkhawma tarlan a nih dan chuan, nikum 2014-15 chhung khan Mizoram pumah thisen Unit 23,093 dawn a ni a, heng zingah hian a thawna dawn zat chu Unit 17,663 niin thisen thleng aṭanga dawn 5,430 a awm a, a thlawna thisen dawn zat hi za zela 76.49 a ni.