Yoga hi sakhuana atana hlauhawm tur chi a ni lo:SPANY

SERCHHIP: Pawl ding thar Society for the Propagation of Ayurveda, Naturopathy and Yoga (SPANY) chuan Yoga chu sakhuana atana hlauhawm tur chi a ni lo an ti.
Nimin khan Aizawl Press club a thuthar lakhawmtute kawmin, SPANY hruaitute chuan Yoga chu taksa leh rilru hrisenal atan leh thlarau inenfiaha tihthianghlimna tana hman lai aṭanga thiamna inchhawm leh inzirtirna thil a ni tih an sawi a, sakhuana zawnga intihluihna emaw sakhaw dang tana zirtirna hlauhawm inchhawm theih thil a awmlo a ni an ti.

International Yoga day chu hman a nih dawn khan UNO hnuaia khawvel ram 193 zingah 177 laiin hneh takin an remti tih sawi bawkin, hman remti ram zingah hian Kristian ram an tam ber thu leh Muslim ram 46 pawhin ṭha an ti tih an sawi a ni.

An pawl Sr Advisor Pu M.Lalmanzuala chuan he hun hi kaihruaiin Yoga chu a belhchian tawh thu leh sakhaw lam buai theihna a awm lo a ti a, hriselna inzirtirna leh inenkawlna chu ṭha a tih thu sawiin, he thiamna hmang hian mi tam tak chuan taksa damna an chang a ni a ti.

SPANY hruaitu zinga mi Pu Lallianzuala, Yoga chung-chang ziak tawhtu chuan he thiamna hmang hian damna a chan nasat thu a sawi a, he thiamna hi nunkawng leh nunphung kaihhruaina ṭha a nih thu leh insawizawina avanga taksa damna a thlen nasat thu a sawi a, Allopathy lama specialist leh Naturapathy Doctor ni bawk Dr. Lalzahawma pawhin thu sawiin, a zir tawhnaah sakhaw lama in tur luih leh nghawng nei zawng a awm a hriat loh thu leh he thiamna hi insawizawi na bakah rilru hriselna atana hman chi anih avangin nghawng thalo -side effect a awm lo a ti a, hriselna leh damna atan hman tlak tak tak a tling tih a sawi a ni.

Nimin khan Department of AYUSH huaihawtin Lunglei Civil Hospital OPD kawtah ‘Yoga Day’ hman a ni a; Medical Superintendent Dr.Lalsanga chuan inkhawm kaihruaiin Yoga chu taksa leh rilru insawi-zawi nan a ṭha a, khawvel hmun tinah Yoga-in zuitu a ngah tawh avangin hnam leh hnam inkarah pawh remna leh muanna thlen-tu a nih theih a rin thu a sawi.

Tarlan tawh angin, Mizo-ramah Yoga Day hman duhlo pawh an awm a, kohhran hrang hrang intelkhawmna Mizoram Kohhran Hruaitute Committee (MKHC) chuan Yoga hi zirna inah zirlaite zirtir an nih hma ngeia zirchiang turin Chief Minister an ngen a, hei bakah hian Pathianni-a Yoga Day hman an duh loh thu an lo thlen tawh bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram