Grape thar sâwr ṭan

Champhai Grape Growers’ Society chuan nimin aṭang khan member-te thar chhuah grape Champhai Winery-ah leiin,  grape rah te hi sawr tan nghal a ni.
Winery chuan nimin ringawt khan Grape rah Quintal 50 an lei a. He hun hmanpuitu Champhai Sub-Divisional Horticulture Officer (SDHO) Pu Lalvansanga chuan heng Grape rah te hi a sawrna khawlah a barhlut. Kum 2015 a Grape rah thar Winery a sawr tanna hun hmanna,  Champhai Grape Growers’ Society Chairman Pu B. Remmawia kaihhruaiah hian Champhai SDHO Pu Lalvansanga chuan kut hnathawktute thawhrah sum a chantir theihna hmun Champhai a din alo ni ta chu lawmawm a tih thu leh Grape Growers’ Society te thawhrimna leh tumruhna avanga hetiang dinhmun hi ding thei an nih thu a sawi bakah, hmachhawp tam tak hlen chhuah tur awm mek pawh hlen chhuah anih theihna turin lalkhawmte chu duhsakna a hlan a ni.

Champhai Grape Growers’ Society chuan kumin atangin CHAMP WINE siam chhuak turin hma a la mek a,  Um khat hi 350ml  zel niin, a man tur hi la bithliah loh a ni thung.

Grape rah hi Grape Growers’ Society memberte hnen atangin Kg 1 Rs 30/- zel a leisak anih laiin,  member nilo te hnen atangin kg 1 Rs 25/- zel a leisak a ni thung a. Kuminah a tam thei ang ber Grape rah, lei tum anih thu leh nikum lam ai chuan Grape rah thar that an inbeisei thu Grape Growers’ Society hruaitute chuan an sawi a ni.

Nikum khan Champhai District-ag grape quintal 1,12,981 thar chhuah niin, nikum hmasa (2013) khan Champhai District-ah Grape Quintal 1,06,196 thar chhuah a ni a. Nikum hmasa a Grape thar chhuah khumna hi Quintal 6785 niin, tunah hian Winery-ah Wine litre 20,000 chuang a awm mek a ni.

Nikum a Grape thar Quintal 1,12,981 atang hian Champhai Winery-ah Grape Quintal 13,000 sawr niin,  Hnahlan Winery-ah Quintal 1,802 vel sawr a ni thung a.  A bak zawng hi mimal Grape Wine atan a siam  leh a rah hralh a ni.

Nikum chhung khan Champhai leh Hnahlan Winery-ah Grape Wine Litre 1,39,226 siam chhuah a ni a.  Champhai Grape Growers’ Society leh Guwahati a Wine siamtu company  M/s Radiant Manufacturer Pvt. Ltd ten inremna (MoU) an siam angin a tum khatna atan kumin May thla khan Grape tui (concentrated wine) litre 16,000 chu @ Rs 50/- per litre a hralh chhuah a ni a,  kumin chhung hian (Concentrated) wine Litre 36,000 hralh chhuah Champhai Grape Growers’ Society chuan an beisei a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram