Nimin chawhnu dar 2:00 khan Serchhip DC Conference Hall-ah Sub-Headquarters YMA, Serchhip buatsaihin “World Youth Skills Day” leh tun hnaia Mobile Vocational Training chhuak te hnena an hnathawhna tur hmanrua semna hun hman a ni a, Mizoram Chief Minister Pu Lal Thanhawla, Training chhuakte hmanrua tur tum saktu ni bawk chuan he hun hi khuallian niin a hmanpui.
Khuallian Pu Lal Than-hawla chuan ṭhalaite fuihna thu sawiin anmahni tuina zawng taka eizawnna an hmuh theih nan thiamna bik nei tura chher puitlin hi sawrkarin a tum a, thalaite chu ram innghahna bulpui pakhat an nih bakah age-group lian ber luah tu an ni a, ram hmasawnna leh intodelhna pawh thui takin anmahni ah a innghat a ni a ti a, hei vang hian skill development pawh hi kan uar deuh deuh a tul a ni a ti bawk. Chief Minister chuan vawiin ni denchhen hian Sawrkar Laipui pawhin Skill Development atana ruahmanna thar engemawzat a chhawpchhuak dawn a, Mizo thalaite pawhin hei hi ngaihven se a duh thu sawiin thalai chhawr tlak, khawi ramah pawh chhawr theih tur “export quality” chher ngei an tum thu leh sawrkar pawhin theihtawp chhuaha hma a lak zel dawn thu a sawi bawk.
Thusawitu dang Pu T. Sangkunga, Chairman, Mizoram Youth Commission pawhin Skill Development pawimawhzia uar taka sawiin MYC hmalakna hrang hrangte a tarlang bawk a ni.
Chief Minister hian thu a sawi zawh hian May 19-June 19, 2015 a MYC leh Sub-Headquarters YMA ten Mobile Vocational Training an buatsaih a training tha taka zo mi 92 hnenah an trade thlan azira an hnathawhna tur hmanrua a sem nghal a, heng hmanraw leina atan hian Chief Minister hian ama pawisa cheng nuaih 4 chuang a hmang a ni.
Chief Minister hi Pu H.Rohluna, Minister, Industries Dept., Pu Joseph Lalhim-puia, Parliamentary Secretary leh Pu T. Sangkunga, Chairman, Mizoram Youth Commission ten an ṭawiawm a ni.
Nimin inkhawm hi Pu Kawlthuama, Vice President, Sub-Hqrs. YMA, Serchhip in a kaihruai a, Pu Lalsawmzuala, Superintendent, MYC in report pe in, Pu C.Lalhminghlua, Chairman, Education & Youth Affairs Sub-Committee in lawmthu sawina hun hmangin hnu a khar a ni.