Manchester City-in Sterling an lalûtfel ta

Niminpiah khan Manchester City hian Sterling hi a man hi £49m niin, Manchester City hian £44m an pe phawt a ni. Hetihlai hian Liverpool a zawm hmaa a khelhna QPR chuan Liverpool-a an hralh khan an inremna ziakah Liverpool-in an hralh lehna aṭanga QPR-in 20% chang ve leh tura an ziak tel avangin QPR hian 20% chu an chang ve dawn a, QPR aṭang hian £600,000-in Liverpool hi a zawm a ni.
Liverpool-ah 2017 thleng contract neiin, kum 5 dang atan Brendan Rodgers chuan kar khat chhunga £100,000 hlawh turin sawm mahse Sterling hian a hnawl a. Mi tam tak chuan sum duh em em angin an sawi, hetih lai hian Sterling chuan Liverpool chhuahsan hrim hrim a duh tih tichiang tura a agent Aidy Ward thusawi chhuahah a lawm hle a, Aidy chuan, “Kar khat chhungin £900,000 lai pawh Liverpool hian hlawh pe dawn mahse contract thar a ziak duh lovang,” tiin a sawi.

Sterling hian Liverpool hnenah chhuah dil mah se Liverpool-in an phal lova, mahse Sterling hian cham chhunzawm a duh tawh loh avangin training a zawm duh lova, tour naah pawh a kal duh lo a ni.  Hetiang anih avang hian Liverpool leh City inbe tha lehin £49m sengin City-in an lalut a, English player man to ber a ni a, British player man to ber dawttu a ni bawk.

Sterling chuan, “Boruak tam tak kara City ka zawm thei hi ka lawm a ni. City-ah hian player tha leh quality tak tak an awm a, world-class player awmna a nih avangin ka phur tawh a ni,” tiin a sawi a, Sterling chuan, “Kum 15 chauh ka ni chunga Liverpool-a min laluttu Rafael Benitez chungah lawmthu ka sawi a, naupangte ka nichunga min ringtu Kenny Dalglish chungah pawh lawmthu ka sawi bawk. Vawi tam tak min inkhelhtir a, chance min petu Brendan Rodgers hnenah lawmthu ka sawi a, ani vang chauh hian miin ka talent neihte hi an hriat phah a ni. Ka nu,unaunu, management team leh ka agent Aidy ward hnenah lawmthu ka sawi bawk a, anni vanga hetiang thleng thei hi ka ni” tiin a sawi.