October thla aṭangin Mizoramah Food Security Bill hman tum a ni

SERCHHIP: Food Security Bill hmanga mipui hnena buhfai semchhuah chu October thla aṭanga hman ṭan tum a ni.
Nimin khan Assembly Budget Session-ah Food, Civil Supplies & Consumer Affairs Minister Pu John Rotluang-liana chuan The Mizoram Food Securities Rules, 2015 leh Guidelines for Selection of Beneficiaries under The National Food Security Act in the State of Mizoram a pharh a, hetah hian Pu John Rotluangliana chuan Food Security Bill, 2013 kalpui chu hreh hle mahse sawrkar laipui nawrna avangin hman loh theih ani tawh lo tih a sawi.

Pu John Rotluangliana chuan he Scheme hnuaiah hian kum 2011 chhiarpui aṭanga chhutin Mizoram mipui 7,06,000 chauh a tuam dawn tih a sawi a, hei hi khawpui-ah chuan mi za zela 46.60 a nih thu leh thingtlangah chuan mi za zela 81.88 a ni a ti a. He scheme hnuaiah hian mi 7,06,000 te hian mi 1 zelin buhfai kg 5 zel an dawng dawn a, Kg 8 an dawn lai pawha an kham loh avang leh he bill-in a tuam ve loh mi 5,03,704 ten buhfai an dawng ve thei dawn lo a ni a ti.

Hetiang hi Food Security Act kalphung nimahse, Mizoram mipuite hmakhua ngaihtuahin Sorkar chuan sum indaih lo chungin Food Security Act-in a huam ve loh te hnenah pawh thlatin kg 8 zelin a sem chhunzawm dawn tih Supply Minister chuan a sawi a, “Food Security Act hnuaia thla khat a kg 5 dawng turte pawh tuna Sorkar rate dinglai kg khat cheng 15 hisapin, kg 3 dang chu pek belh tho an ni ang” a ti bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram