Argentina chuan kum 1993 hnu-a Copa America title an lak lehna hmasa ber lak tumin final-ah Chile an hmachhawn thei dawn ta a, nimin zing khan Final thleng tur hian 6-1-in Paraguay an hneh a ni.
Semi-Final-ah hian Argentina hian goal 6 zet thun mahse an captain Lionel Messi chu goal thuntu zingah a tel ve lova, amaherawhchu goal thum a siamsak bakah goal dangah pawh a inrawlhna a nei a, goal thun lo mahse Argentina Game khaidingtu pawimawh tak a ni tho a ni.
Argentina hian minute 15-naah goal an khung nghal a, Messi free kick pet ṭha zet chu box chhunga awm Rojo chuan lei hrulah chiang takin a pet goal a, minute 27-naah Messi chuan Javier Pastore tan ball ṭha tak a pe a, Pastore chuan chiang set sawtin a lo thun ve leh a, Argentina hian game thunun hle mahse minute 43-ah Paraguay tan Lucas Barrios chuan goal a khung ve thung a, hei hian inkhel a ti nung thar leh a, mahse First half a tawp chhunzawm a, 2-1 in Argentina chuan hma an hruai.
Second half-ah game nung tak kan hmu dawn emaw kan tih laiin Argentina chuan goal an khung chho ta mawlh mawlh a, ṭan aṭanga minute 2 hnu lekah Pastore through ball ṭha tak chu Angel Di Maria chuan goal khung nan a hmanga, Minute 53-ah Di Maria chuan a goal hnihna a khung zui leh nghal a, Messi ball pek ṭha zet chu Pastore chuan shot-in, Paraguay goalkeeper Villar chuan a lo dang a, hemi per hi Di Maria chuan a pet goal a ni. Argentina hian an la duhtawk mai lo, hun tawp dawn lamah goal hnih dang an khung leh a, Sergio Agüero chuan lakchhuah a nih hma chiahin Di Maria ball cross ṭha zet chu a tauh goal a, Agüero thlaktu Higuain chuan goal a rawn thun leh nghal a, Messi through ball ṭha zet chu Higuain hian a pet goal a ni. Hun a tawp chuan Argentina chuan 6-1 ngawtin hnehna an chang ta a ni.
Group match-ah Argentina leh Paraguay te hi 2-2-in June ni 13 khan an lo inhnehtawk tawh a, Semi-Final-ah erawh an sawp ta hle a, Argentina hian kum 2007 hnua Final an luh lehna hmasa ber a ni nghe nghe a. Brazil-in quarter final-a an ngam loh heti taka Argentina-in an sawp takah chuan mi tam berte chuan champion turin an ring hle a, chutih laiin a thlengtu Chile hi team khauh tak an ni a, final hmuhnawm tak kan en dawn niin a lang.