Chief Minister, Pu Lal Thanhawla’n sawrkar hna-thawkte’n sawrkar thu chhuak an pawisak loh avangin sawrkar-in Office Memorandum a chhuah tih House a hrilh.
Nimina Assembly inkhawma zawhna leh chhanna huna Cong-ress member, Pu PC Zoram-sangliana zawhna a channaah Chief Minister chuan, March ni 23 Assembly Session-a a thusawi chu sawrkar hnathawk te’n an bawhzui ṭha lo nia sawiin, zahthlak a tih thu a sawi a, hemi chungchangah Session-a zawh-na a awm leh chu lawmawm a tih thu sawiin, hei hian sawrkar hnathawkte inthlahdahzia a tilang a, House-a member-te thusawi chu ngun taka vilin bawhzui ngaite an bawhzui tur a ni a ti a, mahse, March ni 23-a a thusawi bawhzui a nih loh chungchangah Member-te ngaihdam a dil bakah, sawrkar hnathawkte inthlahdah avang hian amah pawh a mualpho hle tih sawiin, sawrkar thu chhuak rang taka an bawhzui theih nan nimin khan Office Memorandum pawh chhuah a nih thu a sawi.
Pu PC Zoramsangliana chuan, March ni 23-a House Leader-in member te thlavang a hauh chu zahawm a tih thu leh OM a chhuak ta chu lawmawm a tih thu a sawi a, sawrkar hnathawkte’n House an ngaipawimawh lo ni-a a ngaih thu sawiin, zawhna leh channa hun hman laiin ṭha takin ngaithla mahse, thil pawimawh dang tih lai chuan an ngaithla ṭha peih lo hle a ni a ti bawk.
Larsap lak luh inkhawma MLA ṭhenkhat sawm an nih loh thu a sawi rualin Pu PC Zoramsangliana chuan, sawm an nih loh chhan an zawhfiah pawhin zah lo takin an chhâng niin a sawi a, tun hnuah sawrkar thu chhuak zah lo an awm chuan House-ah Privilege Motion hman mai ṭha-a a hriat thu a sawi bawk.
MNF member, Dr. K. Bei-chhua pawhin thil pawimawh-ah sawrkar hnathawk pakhat a biak theih loh thu te, zan dar 11-ah phone a lak chauh thu leh vin taka a lo chhan thu a sawi a, state pawna Mizoram House pakhatah pawh thawktu pakhatin motor âwl a awm reng laiin mi dang nena chuang dûn tura a tih tawh thu sawiin, heng mite laka hremna lek mai ṭhaa a hriat thu a sawi bawk.
Eptu Group hruaitu, Pu Vanlalzawma pawhin state dang sawrkar hnathawkte’n mipui aiawhte an zah thiam hle laiin, Mizoramah chuan an zah tawk lo ni-a a hriat thu a sawi a, Chief Minister thusawi an bawhzui lo chu pawi a tih thu a sawi bawk.
Member dangte sawi zawh hian Chief Minister, Pu Lal Thanhawla chuan, House-a member-te thusawi aṭangin sawrkar hnathawkte’n tih tur an nei a ni tih inhre chhuak se a duh thu a sawi a, tuna an inthlahdah hian sawrkar mizia a tilang chiang hle tih sawiin, an ṭhanharh theih nan tu emaw ber lakah Privilege Motion put luh mai ṭha a tih thu a sawi a ni.