SERCHHIP: Kum 20 chhung rambuai hnu a rammu MNF leh sawrkar laipui kara inremna ni champha vawi 29 na Remna Ni tia vuah chu nimin khan Mizoram hmun hrang hrang ah lawm a ni a, Serchhipah pawh he ni hi Serchhip Block Congress Committee huaihawtin Serchhip Hmarveng YMA Hall ah hman a ni a, he hun hi Pu Lalpiangthanga, Gen. Secretary MPCC chuan a rawn hmanpui a ni.
Serchhip-a Remna Ni cham-phaphak puala hun an hman hi Pu Lalramliana Sailo, President, Serchhip Block Congress Committee-in a kaihruai a, Rev C.Lalhungliana, BCM Ser-chhip Bialtu Pastor-in hunserh a hmang a, remna ni thuchah hrang hrang ngaihthlak a ni.
He hun rawn hmanpui tura beisei, Pu H.Zothangliana, Parliamentary Secretary chu dam-lohna avangin Tlungvel aṭang-in a let leh a, he hun hmanpuia lo kal, Pu Lalpiangthanga, Gen. Secretary MPCC hnen aṭangin thu sawi ngaihthlak a ni a, Pu Lalpiangthanga chuan ram-buai lai hrehawm zia hriain remna kan neih theih nan Pu Lal Thanhawla leh a kaihhruai Congress Party chuan theih-tawp a chhuah a, chumi avang chuan Remna kan neih cham-pha phak vawi 29 na hial kan hmang thei ta a ni a ti a, Remna hlutzia hriain MPCC Gen Hqrs chuan Remna ni hi a neitu dik tak kan ni tih hriain Mizoram pumah theih anga ropuia hmang ṭheuh turin ruahmanna a siam a ni a ti.
A sawi zel na ah Pu Piang-thanga chuan Remna hi lo thleng ta lo se, Mizoram dinhmun tur hi a thim hle a ni a ti a, Remna kan neih theihna tura Pu Lal Thanhawla thlang tlingtu Ser-chhip mipui te leh Congress Party Workers te chu chawimawi phu an ni a ti bawk. Remna kan neih reng theih nan Congress party worker te chuan rilru thar kan neih a ngai a, Unit, Block ah te pawh thawhhona ṭha tak kan neih reng a ngai a, VC leh Party inkarah pawh inpawhna ṭha tak kan neih a ngai a ni, tiin, Remna a awm theih nana a Congress Party President leh Chief Minister ni bawk Pu Lal Thanhawla inpekna hrereng a, a ṭul hunah chuan tlâwm ngam turin remna ni hmang tute chu a chah bawk.
He hun ah hian Serchhip Block Congress Party Senior member Pu T.Rosiama bakah, kalkhawm te aṭangin Remna hlutzia thu sawi ngaihthlak a ni a, MPCC Thalai Organiser Johan Lalmalsawma leh AB-a te bakah zaithiam dangten kalkhawm te zaiin a n awi a, remna avanga lawmthu sawina leh inhlan tharna ṭawngṭai rual neih a ni bawk.