Electric Bill tihsân tum dan dik lo taka mipui bum tumna leh mipui rawkna turah ngai

Kawlphetha (electricity power) hman man tihpun tum-na awm mekah kawlphetha pek-na atana pawisa ngai (aggregate revenue requirement) anga an tarlan zingah mipui sum (public money) aṭanga hlawh pek department hnathawk te hlawh tur cheng nuai 4,336 an chhut tel leh avangin PRISM chuan he thil hi diklo taka mipui bum tumna leh mipui rawkna tur rapthlak takah an ngai tih thuchhuah siamin an sawi.
Nimina PRISM thuchhuah-in a tarlandan chuan, India ram pumah Power & Electricity Department hi corporation-a leh vek tura tih niin state tam zawk chuan an department te corporation-ah an let tawh a, chutianga corporation an nih chuan a thawktute hlawh kha anmahnin an thawhchhuah a ngaih avangin electricity power pekna atana sum mamawh chhutnaah a thawktu te hlawh tur an chhut tel a ngai a, Mipui sum, sorkar pawisa tia kan sawi thin atanga hlawh pek an nih tawh loh avangin bill-ah an hlawh tur an dah tel thin a. Hei hian power man tipung mahse mipui chhiah pekkhawm atanga thawktu hlawh pek anih chuan loh avangin mipui tan pawh a na chuang lo a ni, an ti a.

Mizoramah erawh chuan, corporation atana lehna tura sum mamawh kan dawn ṭeuh tawh hnuah pawh, Power & Electricity Department kan la nei reng a. He Department-a thawk zawng zawng te hlawh tur hi Budget-ah dah vek a ni a, Mipui sum, sorkar pawisa tia kan sawi thin, kan chhiah chawi tlingkhawm atangin hlawh kan la pe a, an hmalakna atana sum mamawh dang pawh kan la tum vek a ni, an ti.

Tuna power man tihsan an tum lehnaah hian thawktu hlawh tur cheng nuai 4,336 te, repair and maintenance tur cheng nuai 658 te leh administration and general expense tur cheng nuai 107; belhkhawma cheng nuai 5,101 an tarlang tel a. Heng tur hi chu budget-ah a awm leh vek dawn a. Chuvang chuan heta cheng nuai 5,101 hi mipuiin kan chawi nawn dawn tihna a ni a. Power pekna atana pawisa mamawh zawng zawng cheng nuai 25,550.58 nia an tarlan hi budget-a awm tho tur cheng nuai 5,501 tello chuan cheng nuai 20,049.58 chauh a ni dawn a, bill tihtlem duai theih a ni tihna a ni an ti a, hetianga mipui sum aṭanga pek tur cheng nuai 5,101 lai electric bill aṭanga mipui hnen aṭanga khawn chhuah nawn an tum hi mipui bum tumna lian lutuk, nasa taka mipui rawknaah PRISM chuan an ngai tih an sawi a, an siamṭhat a, bill pung tur hi an tihtlem ngei an phut tih an sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram