Nimina ZNP chhung inkhawm, an Party Office-a neihah Pu Lalduhoma chuan thusawiin, “Congress sawrkarin a sawrkar tirh aṭanga vawiin thlengin Tlawng lei a dawh zo thei lo hi thil mak a tling”, a ti a, “Lei pakhat pawh dawhzo thei lo sawrkar hi zoram mipui mamawh chhanna a ni thei lo” a ti bawk.Pu Lalduhoma chuan, Delhi Chief Minister Arvind Kejriwal chuan Fly over bridge kum 3 chhunga dawh zawh tura ruahman chu a aia hma thlarukah dawh zo-in, a senso tura ruahman zat hmang zo loin, cheng vaibelchhe 150 lai an hmang bang thei a ni. Hetiang ang sawrkar leh Chief Minister hi Zoram pawhin a mamawh tawh hle a ni tiin, “Tlawng lei chauh lo pawh khawi lei pawh zawhchim a nih chuan, a zawh tawk aia rit phurin a zawh chim vang a ni vek. Chim mai thei lo tura a kiang maia dawh theih reng si, kum tam tak chhung pawha dawh zawh a ni thei lo hi a chim leh vat chhan dik tak zawk chu a ni” tiin, “Lei pakhat dawh zo tura term 2 kan mamawh zel dawn anih chuan hmasawn a har hle dawn a ni” a ti.
Nimin veka Mizoram Peoples Conference (MPC) Party meeting chuan resolution siamin Mizoram sawrkar chu Aizawl – Lengpui Airport panna leilawn chim dawh ṭha tura hma la tawk lova an ngaih thu an sawi a, Mizoram leh Tripura inkalpawhna leh, India ram state dangte thlawhna hmanga zinna kawngpui ber Aizawl – Lengpui Airport panna kawng pawimawh tak lei chim, tun thlenga dawh lova la awm hi mawhphurhna la ngamlo sawrkar vangah an ngai tih an sawi a. Ei leh bar zawnna lama Mizo mipuiten he lei dawh a nih lawk loh vanga mipuiin sum leh pai ṭul lo taka an sen ral tam zia hre tawk lo leh chhût chhuahna nachang hre lovah MPC party chuan Congress sawrkar chu an puh a ni.