SERCHHIP: India rama Food and Agriculture Organisation (FAO) palai Pu Shyam Khadka chuan Mizoram aia ram chhengchhia leh ruahtui dawng tlem zawk pawhin buh leh bal, thei leh thlai tam tak an thar chhuah theih chuan, Mizoram hian chhuanlam tur a nei lo, a ti.
Pu Shyam Khadka hian Thawhlehni khan ṭhiak-a Horticulture Centre of Excellence tlawhin, lo nei mite nen inkawm-na hun an hmang a, lo nei mite hian an hma lakna leh harsatna an tawh hrang hrangte a hnen-ah hian an lo thlen a, he hun an hmanaah hian Pu Shyam Khadka chuan Horticulture Centre of Excellence chu Mizo-rama Horticulture tihhmasawn-na tur pawimawh tak a ni ang tiin, a enkawltu leh hma latute chu theihtawp chhuah zel turin a ngen a, Mizorama thingtlang lo neih dan pangngai a theih chen chena kalsan a, terrace leh ramngaw tam zawk siam a nih theih nan FAO-in hma a lak mek thu sawiin, Mizoram aia ram chhengchhia leh ruahtui dawng tlem zawk pawhin buh leh bal, thei leh thlai tam tak an thar chhuah theih chuan, Mizoram hian chhuanlam tur a nei lo, a ti a. Ram leilung leh tui hnate humhalh a, ruahtui khawl a pawimawh thu leh lei atanga mamawh la chhuak ringawt lova lei hi a mamawh pek let ve a pawimawh thu sawiin, Pu Shyam Khadka chuan ran ek leh thlai hnah tawih atanga lei tha siamte hman uar a pawimawh thu a sawi bawk.
Pu Khadka chuan FAO leh Mizoram sawrkar Agriculture Department hma lakna, Mizo Sloping Agricultural Land Technology (MiSALT) trainer turte training neihpui mek chu a hmunah a tlawh nghal a. Training neihpuitu FAO-a Senior Consultant Pi Antonio Paliwal-i chuan an training pek dan lo hrilh fiahin, Mizoram leilung leh a mi chengte sukthlek mila eng kim kalpui a nih thu a sawi. He training-ah hian ATMA, Agriculture Department, Horticulture Department, Soil & Water Conservation Department leh All Mizoram Farmers’ Union (AMFU) lam aiawhte an tel a ni.
He Centre-a Horticulture Extension Officer Pu Henry Lal-remruata Varte chuan Pu Khad-ka chu Agricultural Technology Management Agency (ATMA) hnuaia Horticulture Farm House te a lo fanpui a. Horticulture Department-in ṭhiak-a lo nei mite bul a ṭansak dan leh hma a lakpui dan te, 80% subsidy-a poly-house sakna tur a pek thu leh thlai chi turte pawh a ngaih-tuahsak ṭhin thu a lo hrilh a ni. ṭhiak-a Horticulture Department hma lakna hi chhungkaw 90 velin chhawrin, tlangram lo neih bansanin huan thlai chin lamah an inlet tawh a. Tuna MiSALT project atan hian chhungkaw 6 thlan an ni bawk.
Pu Shyam Khadka hi Mizorama UN Programme Co-ordinator Pu Rinzuala Ralte leh Liaison Officer for UN Team Pu Hmangaih Johana te’n an tawiawm a ni.