MLA ten 13th Finance Commission sum hmanga hnathawh te endik

Mizoram Legislative Assembly hnuaia a vawikhatna atana din, MLA 7 telna Committee peng pakhat Committee on Local Fund Accounts (CoLFA) Member te chuan nimin zing khan Kolasib District huam chhunga Village Council ṭhenkhata 13th Finance Commission aṭanga sum hmuh aṭanga an veng khawthlera Solar Street light an bun leh an veng chhunga PCC flooring, retaining wall leh thil dangte an siam chu an endik.
CoLFA member te hi an Chairman Pu John Siamkunga’n hovin, Member – Pu Vanlalzawma, Pu R. Vanlalvena, Er. Lalrinawma leh Pi Vanlal-awmpuii Chawngthu te an tel a, Committee Chairman Pu John Siamkunga chuan Accounts & Treasuries Department hnuaia Local Audit Fund tena tualchhunga roreltu – Village Council, Local Council leh a dang tena sum an hman dan felhlel leh enchian ngai nia audit findings a tarlan te a hmun ngeia chik a, enchiang leh zirchiang tura Committee hi a fehchhuak a ni a ti a. Sawrkar laipui chuan tualchhung roreltu te sum hman dan endik a tul nia hriaiin Assembly chu hetianga Committee din tura thurawn a pek angin he Committee hi din a nih thu a sawi a. Thil tihsual hailan emaw, tih dik loh laite chhui emaw turin kan rawn kal lova, hmasawnna leh mipui rawngbawlna atan sum, tualchhuang roreltu te hnenah pek hi anih dan leh a hman dan tur ang taka hman a ni em tih rawn enchiang turin leh Audit findings a tarlan te a hmun ngeia finfiah tura lokal an ni, a ti. Committee Member Pu Vanlalzawma chuan Committee thuneih dan te hmun hrang hrang an tlawhnaah hian VC Member te hrilhin sum an hmanna reng renga fimkhur leh uluk takin vawng turin leh dan ang thlapa thil ti thin turin a chah a ni.

Committee on Local Fund Account hian Lungdai, Kawnpui -I, Kawnpui II, Thingdawl leh Kolasib khaw chhunga VC hrang hrang hnuaia 13th Finance Commission atanga sum hmuh atanga Solar Street light bun leh step, lungrem, footpath, kawr leh cement hna dang an thawhte chu vawiin nileng khan an enkual a. Committee Member te chuan heng hna hrang hrang an enkual te hi VC ten tha taka an siam leh felfai taka an zo fel thei chu lawmawm an tih thu an sawi a. Remchang zawk vanga hmun thenkhata street light an sawn chu Committee chuan a hriatthiam rualin, nakin zelah thil a felfai nan hengte hi a chhan ziakin thuneitu te hriattir turin VC te hi thurawn an pe a ni.

Assembly Committee hi Assembly a thawk officer thenkhatte, LAD, ZEDA hotute leh DLAO leh a thawhpui ten an ṭawiawm a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram