Aizawl-a Taxi intlanchhawktir tum duh loh thu sawi

Aizawl Taxi Workers Union (ATWU) leh Aizawl Taxi Stand Welfare chuan March ni 1 aṭanga taxi intlânchhâwk an duh lo a, hemi chungchangah hian nimin chhun khan Zarkawt YMA Recreation hall-ah Joint meeting an nei a, Resolution siamin, an lungawilohna Chief Minister hnena an thlen tawh chu nawrhna lantir kher ngai lova tihhlawhtlin sak turin an phut tih an sawi a, Mizoram sawrkar chuan Taxi intlanchhawkna turte, All Mizoram Plying Permit a titawpte, Tax a tihsan leh Replacement tih theih loh te a kalpui dawn a nih chuan MLA zawng zawng leh Sawrkar Officer leh he thu reltute pawh in kartin ni hnih sum leh pai harsatna denchhen in hlawh la lo ve rawh se, an ti bawk.
Pawl pahnihin resolution an siamah chuan dan hnuaiah dikna leh chanvo an nei ve ani tih sorkar chuan hriatpui turin an duh tih an sawi bawk.

Aizawl Taxi Workers Union chuan Aizawl khawpui tawt hi TAXI mawhphurhna ah ngai lovin mawhphurtu ber chu sawrkar a ni an ti a, khawpui ruahmanna fel a neih loh vang a ni a, Taxi puh kual lovin mawh la ngam rawh se, an ti a ni.

Hetihlai hian, Aizawl Traffic SP Pu C Lal Thanmawia chuan Taxi intlanchhawk chu Traffic Co-ordination thu-chhuak a nih angin kaltlangpui a ni dawn tih a sawi a, hemi chungchanga meeting neih hmasak zawkah ZTDA leh ZTOA leh Stand tin OB te chu an rawn tel thu leh hemi hnu Meeting koh ṭum hnihnaah Stand OB te chauh an tel thu leh hemi ṭumah hian Taxi kaihhnawih pawl thar 2 aiawh an tel tak thu a sawi a, pawl thar te hian intlanchhawk an duhloh thu an sawi ve leh chauh tih a sawi a ni.

Traffic SP chuan, taxi intlanchhawk chu eizawnna tisukuk tura ruahmanna a ni lo tih sawiin, mipuite himna leh mipui ṭhat zawkna tura thlirna zauzawk atanga ruahman a ni a ti a, hemi chungchangah hian High court-ah pawh pawl ṭhenkhat te an zualko hnuah Sawrkar chuan thiam a chan tawh thu a sawi bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram