Zothlifim Logo
Loading ...

Nimin khan Raj Bhavan ah Governor Lt Gen Nirbhay Sharma (Retd) leh Pu T.Sangkunga, MLA, Chairman, Mizoram Youth Commission te chuan inkawmna neiin Skill Development huang chhunga Mizoram sawrkar hmalakna hrang hrang te an sawi dun.
Governor Lt Gen Nirbhay Sharma(Retd) chuan Mizoram Youth Commission thawhrim-na rah Mizo thalai ten an tel mek nia a hriat thu MYC hotute chu a lo hrilh a. Act East hmalakna huang chhunga ramdang nen insumdawn tawnna lo thleng tur ah Mizo thalai ten hlawk taka an chhawr theih nan MYC chuan hna pawimawh tak leh hna hmanhmawh thlak tak an nei a ni a ti a. Governor chuan Mizoram chhunga ramhmul damdawi te sum a chantir a nih theih nan MYC in Mizo thalai te tan inzirna kawng dap se tha a tih thu pawh a tarlang a ni.

Govenor nen an inkawmna ah Pu T.Sangkunga, MLA, Chairman, MYC chuan Mizoram Youth Commission in Mizo thalai tam tak tan eizawnna kawng a kawh hmuh tawh thu hrilh in Skill Development Ministry hmalakna hnuaia MYC hmachhawp leh hlawhtlinna te a tarlang a. Mizo thalai te tana thahnem ngaihna te chu Mizo thalai ten a hlut em em a ni tih Governor chu hrilh in an hmalakna hrang hrang ah theihtawp chhuahpui zel turin a sawm a ni.