Transport Minister, Pu John Rotluangliana chuan nimin khan Motor Vehicle Tax leh Passengers & Goods Tax rate thar a tlangzarh a, heng chhiah te hi mipuiten internet kaltlangin an pe thei tawh dawn tih a sawi nghal bawk.
Transport Minister hian nimin zingkara Aizawl-a Transport Department building thar tualah ‘27th Road Safety Week’ a hawn rualin nimin aṭanga hman ṭan tur, ‘Motor Vehicle Tax’ leh ‘Passengers & Goods Tax’ rate thar hi a tlangzarh nghal a, Minister chuan Mizoram sawr-karin tuna lirthei aṭanga chhiah lâk tur rate thar a tihchhuah hi Central Sawrkara Transport Development Council Meeting-in a lo rel tawh bawhzuina a nih thu a tarlang a. Central sawr-kar chuan State sawrkar tinte chu a tlem berah 6% life-time tax la turin a hriattir tawh tih sawiin Minister chuan Mizo-ramah chuan mipuite hmakhua ngaiin Central sawrkar phal china a hniam thei ang ber, 6% kan hmang dawn a ni, a ti.
He dan hnuaiah hian private motor zawng zawng te, autorickshaw, taxi leh maxicab-te chuan life time tax (kum 15 atan), motor man (VAT chhut hma) atanga 6% an pek vek a ngai tawh dawn a, Motor register sa, life-time tax pe tawhte chuan an lirthei upat dan a zirin an tax pek tawh aṭanga rate bithliah sa an pek tel a ngai dawn bawk a, Passengers and Goods Tax pawh kum 25 aia rei rate ngai hman a nih hnuin February ni 8, 2016 aṭanga hman ṭan tur in rate thar siam a ni bawk.
Kumin Road Safety Week-in a tum ber chu ‘Lirthei accident laka kan fihlim theih nan a takin hma i la ang u’ tih a ni a, Minister chuan lirthei khalhtu te ngaihtuahna la peng thei thil, zu leh ruihtheih thil chi hrang hrang te, music ring lutuk leh earphone ngaihthlakte hi accident thlen tirtu tam ber an nih thu tarlangin, passenger te leh lirthei neitute pawhin an lirthei chuanna tur leh a khaltute hetiang kawnga an fihlim theihnan fimkhur turin a chah a. Lirthei khalhtute chu midang ngaichang chunga lirthei khalh ṭhin tura chahin, traffic rules kan zawm that vek chuan lirthei chetsualna tam tak kan pumpelh thei a ni, a ti bawk.