SERCHHIP: Inrinni khan MZP chuan Zoram Ni a hmang a, Zoram Ni pual hian Millenium Centre aṭanga Vanapa Hall kawt thleng kawng zawh a ni a, Millenium Centre kawt, Israel point leh Vanapa Hall kawtahte thusawina hun hman a ni.
‘Zoram Ni’ hmanna inkhawm Millenium Centre kawta neih hi Pu B.Vanlaltana, Vice President MZP-in a kaihruai a, Pu Hmingchung-nunga, Adviser chuan hunserh hmangin, hun hmasa lama Zoram Ni hman a nih dan report Asst. General Secretary Joseph K.Zohmingliana’n a pe a, Pu Lalsangzuala Ngente President, MZP in thu a sawi bawk.
Pu Lalsangzuala Ngente, MZP President chuan, “Zalenna sualtute khan mahnia ro inrelna neih duhna thinlung an put vangin MZP chuan kan chhuang a, zalenna an sual tak tak a ni. Zofate hi Pathianin min la zawm khawm ang a, rem a tih hunah rorelna pakhat hnuaiah kan la awm ngei kan beisei tlat a. Vawiin hian India ramin Mizoram a bomb champha hmang ni mahila kan thinlungah huatna thar lo se, hmasawnna leh changkanna kawnga rahbi tuk thar duhna ken neih ni lo ni zawk se la, Zofate hi engtik ni-ah emaw chuan ram rorelna pakhat hnuaiah awmin zalenna meichher hi kan la chhi dawn a ni” a ti.
Israel point-a thusawitu Pu VL Krosshnehzova, MZP Adviser chuan, “India-in min bomb champha ‘Zoram Ni’ hi party ṭhenkhatin Politics-a hlâwkna leh ṭhenkhat inhêksak nana hmang kan ni lova, kan tawrhna hre reng chunga hmasawnna leh inpumkhat duhna thinlung kan put thar theihna hun atana hmang kan ni a. Sawisel tam aiin thawhchhuah tam kan inzirti a ngai tawh zawk a ni” a ti bawk.
Vanapa Hall kawta thusawitu Pu Denghnuna, IAS (Rtd.) chuan India-in Mizoram a bomb leh bomb loh hi inhialna chi a ni lova, a bomb ngei tih a chian thu a sawi a. Ved Marwah a lehkhabu ziah ‘Uncivil Wars’ Patholism of terrorism in India’ phek 236-naah chiang takin India-in Mizoram a bomb thu leh zathlak a tih thu a chuan thu a sawi a, India ram tan pawh kan thu bengkhawn tlaka a nih theih nan kan intodelh a pawi-mawhzia hre thar turin zirlai kalkhawmte a fuih bawk a ni.
Ni 5 Match, 1966-ah India sawrkarin a ram chhung mite chungah vawiin ni thlena a la tih ngai loh Jet fighter leh bomb hmanga Mizoram a beihna champha hi kum 2008 aṭang khan hmang ṭanin, kumtin hman chhoh alo ni ta a ni. Zo hnathlak unau zawng zawngte chu he Zoram Ni pual hian insuihkhawmna leh hmasawn duhna thinlung pu thar leh zual turin MZP chuan a chah a ni.