Guwahati-ah Lunglei tlangval pahnih thiin chhar

Nimin zing khan Guwahati-ah Lunglei tlangval pahnih ruang chhar a ni.Nimin zing dar 4 vel khan Lunglei Electric Veng tlangval pahnih North East Rural Livelihood Project (NERLP) kal-tlanga Skill Development hnuaia Downtown Hospital, Guwahati-a Technician zir mek C.Lalhma-ngaihsanga (24) S/o Chawng-hranga leh R.Lalmalsawma (24) S/o Lalthanzami te ruang chu Guwahati rel kawng sirah chhar a ni a, Mi kut tuara thi nia rin a ni a. Lunglei a kan Correspondent hnen atanga thu dawn danin, Lalhmangaihsanga hi a ban leh a ke a tliak a, Lalmalsawma hi a beng atangin thi a chhuak a ni.

C.Lalhmangaihsanga hian Dyliasis zirin, R. Lalmalsawma hian Physiotherapy a zir mek a, Inrinni tlaia tui chêng tur a chhuak an ni a, an rual hian Mizo mipa dang pawh an kal ve nual a, tlai lamah haw rual leh vekin, anni pahnih hi Hostel thleng lovin an Hostel bula nepnawi dawrah an thu khawmuang a, heta tang hian kal sawn lehin, hmun dangah an kal leh a, nepnawi dawr a an hmuh hnuhnun ber hi zan dar 9:00 vel a ni.

Hemi hnu hian an chin hriat a ni tawh lova, nimin zing dar 4 velah an thih thu hi hriat a ni a, an Hostel a Mizo zirlai te chu ruang awmnaah kal nghalin puanin an khuh a, hemi hnu hian Panikheitu Police ten an ruang hi la-in, Gauhati Medical College Hospital-ah Post-mortem nghal an ni.

Nimin khan Mizoram House-ah thlahna neih a nih hnuin Guwahati Mizo Welfare kaltlangin Mizoram rawn panpui an ni a, NERLP hotu te pawhin an ruang hi an rawn zui a. Guwahati-ah hian an zirlai pui bakah GMSU, Admission agency leh Downtown University hotu ten an buaipui a, an ruang hi Downtown Hospital Ambulance a rawn phurh a ni a, vawiinah Lunglei-ah thlan laih a ni ang a, thawhlehni chhun dar 11-ah vui an ni ang.

Mizo tlangval 2 thi a chhar te chungchangah nimin khan MZP chuan thuchhuah siamin zirlai vanduaina tawk ta te leh an chhungte an tawrhpui takzet tih sawiin, anmahni a chesual a boral ni lovin Hnamdang misual kut tuara boral ni ngeiah MZP chuan a ngai nghet tlat a ni an ti a, an zirlai pui kutthlaktute hi a rang thei ang bera man chhuaka an phu tawka a na thei ang bera an chunga hremna lekkawh a nih theihna’n chak taka hma la nghal turin thuneitute an phut thu leh an Zirlai pui chhungte hnenah zangna dawmna pe turin thuneitute an phut tih an sawi a, MZP hian an zirlai pui te hi an lo haw kawng, khawtin-ah an lo hmuak zel dawn a. He thihna chungchangah hian North East Students’ Organisation (NESO) a MZP thawhpui All Assam Students’ Union (AASU) hruaitute pawh MZP chuan be pawp nghal in thil sual ti tute rang taka zawng chhuak a, a na thei ang bera hremna lekkawh tura Assam sawrkar thuneitute hnen a hma lo la nghal tura an ngen thu leh AASU te hian hma lo lak an tum thu MZP hruaitute hnenah hian an sawi a ni.

MSU pawhin thuchhuah siamin vanduaina tawk Mizo tlangval 2 thihna chu pawi a tiin lungchhiat thlak a ti tak zet tih an sawi a. MSU chuan chet-sualna avanga boral ni a an ngaih loh thu sawiin, hnam-dang misual kut tuara boral ah MSU chuan a ngai nghet tlat tih sawiin, thil sual ti tute hi an chhungah hremna lekkawh a nih theih nan a rang thei ang bera man chhuak vat turin MSU chuan thuneitute a phut a, MSU chuang lusun chhung te thinlung takin a tawrhpui tak zet tih an sawi bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram