Serchhip-a awm tura Surgeon sawn chhuah la dang mek

Kolasib damdawi ina Surgeon awm mek, Dr. Zothansanga Zadeng chu Serchhipa awm tura transfer order tihchhuah chu MZP Hqrs. Kolasib chuan sût leh turin sawrkar an ngen a, hetihlai hian Serchhip damdawi ina Surgeon awmchhun Dr. Lalrinmuani chu Lunglei-ah awm turin Transfer Order tihchhuah a ni bawk.MZP Hqrs. Kolasib-in thuchhuah an siamah chuan MZP Hqrs Kolasib hruaitute chu Dr Zothansanga Zadeng in-ah te lêngin kallo tura ngen a ni tih an sawi a, hemi mai bakah hian a inah te MZP Hqrs Kolasib OB ten amah hi an veng thin tih an sawi a, ni 31.5.2017 hma ngeia sawrkarin transfer order hi a sût loh chuan June 1 leh 2 hian Damdawiin, Zirna school leh police tiamloin sawrkar office zawng zawng khâr tum a ni tih an sawi a, hemi hnu pawh a transfer order sût a nih loh chuan a aia na zawk a hmalak tum a ni tih an sawi bawk.

Hetihlai hian Dr. Zothansanga Zadeng awmna hmun tur, Serchhip damdawi ina Surgeon awmchhun Dr. Lalrinmuani chu Lungleia awm tura tih a ni a, Dr. Lalrinmuani hi tunah Aizawlah training-in a awm mek a, Aizawl atang hian Lungleiah hian joining report pek a tum niin hriat a ni.
MZP Hqrs. Serchhip chuan Inrinni-a Executive Meeting an neihah, Kolasib atanga Surgeon Serchhipa sawn tura order chhuak tawh, tun thlenga a hna a la zawm thei lo chungchang hi sawiho-in he transfer chungchang hi zirchianga JN Hospital-a Surgeon dah a nih ngei theih nan a tul dan anga theihtawpa hmalak nise tiin an rel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram