Nimina Kolasib DC Office Conference Hall-a Lok Sabha MP Pu CL Ruala hova Kolasib District Development Coordination & Monitoring Committee (DISHA) meeting neihah Committee Chairman Pu CL Ruala’n chanchinbumite awm ve a phal avangin MJA, Kola-sib District chu Pu CL Ruala chungah an lungawi lo hle.
DISHA Meeting aṭanga hnawhchhuah an nih hnu-ah MJA, Kolasib District chuan emergency meeting nei nghal-in, Lok Sabha MP Pu CL Ruala’n Meeting aṭanga chanchinbu mite a hnawhchhuah avanga an lungawina khawp thu kan hmu leh a nih loh chuan a kaihhruaina hnuaia DISHA Meeting neih tur leh an neih thu reng reng bakah Pu CL Ruala Programme awm reng reng chu Kolasib District chhunga Print media leh Electronic Media ah te tarlan tawh loh nise an ti a, DISHA Meeting-ah Kolasib chanchinbu mite tel phal loh an nih avanga an lungawi lohna chu Prime Minister Office-ah thlen nise, a copy pawh Chief Minister leh Mizoram Governor-ah pek nise an ti a, hemi chungchanga lungawilohna lantir nan hian tunkar chhung (May 23-27, 2017) hian Kolasib District-a Chanchinbu ten Editorial ziah loh vek nise an ti bawk.
Kolasib MJA hruaitute chuan nikum September thla khan Lok Sabha MP hian DISHA Meeting-ah hian an tel a lo phal lo tawh a, kumin January thlaa neihah chuan MJA member te hi DISHA Meeting-ah an tel leh tho a, hetah hi chuan engtinmah a ti lova, nimina DISHA Meeting-ah hian Lok Sabha MP hian a hnawt chhuak leh tih an sawi a, DISHA meeting-ah hian sawrkar laipui sum hmanga hmasawnna hnathawh hrang hrang thlirho thin a ni a, heng sumte hi a khawihtu department-ten an hmang dik em? An hmang ṭha em? Hnathawh hmachhawp leh hnathawh hmasawnna a awm em tihte sawiho thin a ni. Heng sum hmanga hnathawh hrang hrang lo hriat ve hi mipuite chanvo a ni a, an hriat ngei tur pawh a ni an ti a, Kolasib media-te ṭum hnih lai mai DISHA meeting aṭanga hnawhchhuah an nih tak avangin sawrkar laipui sum hmanga Kolasib District chhunga hmasawnna hnathawh hi a hmanna lamah lang tlang lo a awm em ni tih chu an zawhna a nih thu an sawi.
Hei bakah hian chanchin-bu mite chu sawrkar leh mipui inkara palai an nih angin sawr-kar hmalakna hrang hrang leh hmasawnna hnathawhte mipui te hrilhriat chu an rawng-bawl-na leh an mawhphurhna a ni an ti a, amaherawhchu meeting-na hmun aṭanga hnawh-chhuah an tawk a, chanchinbu mite kut phuarsak an ni ta mai chu langtlang lovin sawrkar hian thil kalpui a tum ta em ni? an ti bawk.