Zuk leh hmuam, ruihhlo laka naupangte an fihlim theih nan NEDP hnuaiah Project kalpui

Naupangten zuk leh hmuam, ruihtheihthil laka an fihlim theihna tura venpui leh zilhfing turin New Economic Development Policy (NEDP) hnuaiah “Early Intervention against Tobacco usage and Drug Abuse from Upper Primary School” chu kalpui tum a ni.
Ei leh bar, sum leh paia intodelh turin mipui mimir, a bik takin thalaite an hrisel a pawimawh em em a. Mithiamte zirna atanga a landanin Mizoram chhunga cheng za zela sawmsarih dawn lai meizu an awm a, 90% te chu vaihlo leh a kaihhnawih ti thin an ni. Vaihlo avanga cancer chi hrang hrangah India ram pumah Mizoram a sang ber a, global adult tobacco survey 2009-10 in a tarlan danin mi 9.3% chuan kum 15 an tlin hmain vaihlo an hmang tan a, mi 69.5% te chu kum 15-19 inkara vaihlo hmang tan an ni tih hmuhchhuah a ni. Mizoram hi ruihtheihthil tawlhna “Golden Triangle” tia an vuah bula awm a ni a. Vaihlo atanga tanin ruihtheihthil dang tih belh zel theihna kawng a inhawn zau em avangin naupangin an tih chhin hma hauha venpui leh zilhfin a tul tih hriain sawrkar chuan NEDP hnuaiah he project hi  kalpui tan a tum a ni.

He project-ah hian General Administration Department chuan hma la in Aizawl DC kaihhruaina hnuaiah helam kawnga hma latu department hrang hrang leh NGO te thawkhovin Coordination & Implementation Committee-in hma lak zel dan tur rel thin a ni. Research & Documentation sub-committee din niin zuk leh hmuam, ruihtheihthil that lohna entir thei tur chi hrang hrang buatsaih a ni ang. Aizawl District chhunga sikul 50 vel chu hmalak tanna (pilot project) atan hman a ni ang.

He project chungchang hi Aizawl DC Office website-ah en theihin a awm a. A kalpui zel dan tur kawnga rawtna nei apiang chuan DC Office, Aizawl, Treasury Square-ah emaw Aizawl Bawrhsap Pisapui official facebook page lamah theihluh theih a ni ang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram